Астанада қызметтік міндетін атқару кезінде қаза тапқан 23 жастағы фельдшер Ұлдана Мырзуанның өліміне қатысты қылмыстық іс бойынша алғашқы сот отырысы басталды, деп хабарлайды Ozgeris.info.
Іс Астана қалалық сотында қаралып жатыр. Қылмыстық іс Қылмыстық кодекстің 254-бабының 1-бөлігі — «Міндеттеріне адал қарамау» бабы бойынша қозғалған.
Сот отырысына бұқаралық ақпарат құралдары өкілдерінің қатысу-қатыспауына қатысты шешімді судья қабылдайды.
Марқұмның тарапының адвокаты Нұрсұлтан Орынбектің айтуынша, алғашқы отырыста тараптардың ұстанымы айқындалады.
Оқиға 2025 жылдың 8 қарашасында Астанада болған. Тұрғын үй ғимаратының қасбеті опырылып құлаған сәтте, оқиға орнында медициналық көмек көрсетіп жүрген екі фельдшердің үстіне кондиционер құлаған. Ауыр жарақат алған Ұлдана Мырзуан 10 күн бойы жансақтау бөлімінде ем қабылдап, 18 қарашада ауруханада көз жұмды.
Ұлдана Мырзуан қайтыс болғаннан кейін Қазақстан Президентінің Жарлығымен «Ерлігі үшін» медалімен марапатталды.
Енді фельдшердің өліміне әкелген жағдайлар мен жауапты тұлғалардың әрекетіне құқықтық баға беруді сот анықтайды.
