Елорда төрінде тарихи оқиға болды. Қазақстан Парламенті Сенатының ең соңғы отырысы өтті. Отыз жылдық шежіресі бар жоғарғы палата өз жұмысын толықтай аяқтады, деп хабарлайды ozgeris.info сайты.
Ертең қос палатаның бірлескен жиынында Парламенттің кезекті сессиясы ресми түрде жабылады. Ал бірінші шілдеден бастап оның өкілеттігі тоқтатылады. Бұл халықтың кең қолдауына ие болған жаңа Конституция талаптарына сай іске асып жатыр. Енді тамыз айында бір палаталы жаңа Парламентке сайлау өтеді. Жаңа саяси құрылым "Құрылтай" деп аталады. Осылайша бір мың тоғыз жүз тоқсан бесінші жылғы Атазаң негізінде құрылған жүйе өзінің тарихи миссиясын абыроймен аяқтап отыр.
Жиын барысында Мәулен Әшімбаев жоғарғы палатаның үш онжылдықта атқарған еңбегін қорытындылады. Осы уақыт аралығында 890-нан астам жалпы отырыс өткен. Депутаттар 3500-ден аса заң қабылдады. Оның 350-ден астамына халық қалаулылары тікелей бастамашы болған.
Сенат қабырғасында қаралған маңызды құжаттар Президент ұсынған жаңа саяси модельдің іргетасын қалады. Бұл қатарда экономикалық және фискалдық бағыттар да бар. Еліміздің әлеуметтік саясатының заңнамалық негізі бекітілді. Сот және құқық қорғау жүйесін жетілдіру ісі назардан тыс қалмады. Азаматтардың құқықтары мен еркіндігін кеңейтіп заң үстемдігін орнатуға айрықша мән берілді. Бұл нормалардың барлығы бүгінде ел игілігіне қызмет етіп келеді.
Заң шығарумен қатар палата мемлекет дамуындағы түйткілді мәселелерді әртүрлі форматта талқылап отырды. Осы мақсатта 60-тан аса парламенттік тыңдау өткізілді. Бұған қоса 3000-нан астам жоспарлы іс-шара ұйымдастырылған. Жұртшылықты мазалаған мәселелер бойынша Үкіметке 3000-ға жуық депутаттық сауал жолданды. Жауапты тұлғалар әрдайым халық мүддесі мен мемлекеттік көзқарасты ту етті.
Сенат тарихында барлығы 246 азамат депутат мандатын иеленген. Олардың әрқайсысы ел сенімін ақтап ұлттық парламентаризмнің дамуына сүбелі үлес қосты.
Жиын соңында Сенат төрағасы әріптестері мен аппарат қызметкерлеріне риясыз алғысын білдірді. БАҚ өкілдеріне де бірлескен жемісті еңбегі үшін алғыс айтылды. Сайлаудан кейін жаңа форматта жұмысын бастайтын болашақ "Құрылтай" ұжымына сәттілік тіледі.
