Қырғызстанның Джалал-Абад қаласында полиция қызметкерлері көшеде никаб киген әйелдермен түсіндіру жұмыстарын жүргізді. Бұл рейдтің фотоларын Қырғызстанның мемлекеттік ұлттық қауіпсіздік комитеті жариялады, деп хабарлайды Ulysmedia.kz.
Қырғызстанда биыл қаңтар айының соңында күшіне енген «Діни сенім бостандығы және діни бірлестіктер туралы» заңға сәйкес, қоғамдық орындарда никаб киюге тыйым салынған. Тыйымды бұзған азаматтарға 20 мың сом (шамамен 115 мың теңге) көлемінде айыппұл қарастырылған.
Заң бойынша адамның бет-жүзін жасыратын киімдерге (соның ішінде никабқа) тыйым салынған. Бұған қоса, басқа діндегілерді өз дініне тартуға, дінге бейтарап адамдар мен атеистерге үгіт жүргізуге, сондай-ақ діни жоралғыларды қарттар үйінде, түрмеде, әскери бөлімдерде өткізуге болмайды. Үй аралап діни әдебиет тарату мен білім беру мекемелерінде насихат жүргізу де шектелген.
