Ақтөбе — Астрахань республикалық маңызы бар тасжолында адам өліміне әкеп соққан ірі жол-көлік оқиғасы тіркелді. Ауыр жүк көлігі мен екі жеңіл автокөліктің соқтығысуы салдарынан екі адам көз жұмып, тағы сегіз адам түрлі дене жарақаттарын алды, деп хабарлайды ozgeris.info сайты КТК телеарнасына сілтеп.
Алдын ала мәліметтер бойынша, жол апатына үш көлік қатысқан:
-
DAF маркалы ауыр жүк көлігі.
-
Екі Toyota Camry жеңіл автокөлігі.
Соққының қатты болғаны соншалық, жеңіл көліктердің бірі сол мезетте тұтанып, лапылдап жанып кеткен. Көліктен түк қалмаған - шанағы қатты майысып, бөлшектері ондаған метр қашықтыққа ұшып кеткен. Ал жүк көлігі соқтығысқаннан кейін жолдан шығып, жыраға құлаған.
Өкінішке қарай, апатқа ұшыраған екі адамның жарақаты өте ауыр болып, олар жедел жәрдем қызметкерлері жеткенше оқиға орнында тіл тартып кетті. Қалған сегіз адам шұғыл түрде ауруханаға жеткізілді, қазір оларға қажетті медициналық көмек көрсетілуде.
Өңірлік полиция департаменті осы жағдайдың мән-жайын анықтауға кірісті. Ақтөбе облысы ПД Әкімшілік полиция басқармасы бастығының орынбасары Айбек Орашев жағдайға қатысты ресми пікір білдірді:
«Алдын ала мәліметтер бойынша, үш көлік – DAF жүк көлігі мен екі Toyota Camry жеңіл көлігі соқтығысқан. Жол-көлік оқиғасы салдарынан Toyota көліктерінің бірі өртеніп кетті. Аталған факті бойынша сотқа дейінгі тергеп-тексеру жұмыстары жүргізілуде».
Қазіргі уақытта оқиға орнында сарапшылар мен тергеушілер жұмыс істеп жатыр. Олар қайғылы оқиғаның толық картинасын қалпына келтіріп, апатқа кінәлі тұлғаны анықтауы тиіс.
