Астана мен Павлодар тасжолында жолаушылар мінген такси ауыр жол апатына ұшырап, 21 жастағы студент екі аяғынан айырылды, деп хабарлайды Ozgeris.info сайты Tengrinews.kz-ке сілтеме жасап.
Павлодар облыстық полиция департаментінің мәліметінше оқиға 29 мамырда түнде болған. 22 жастағы жүргізуші басқарған Hyundai Tucson кроссовері темір қоршауға соғылып, салдарынан үш адам ауруханаға жеткізілді.
Оқиға орнынан түсірілген бейнежазбалардан темір бөлшектің алдыңғы жолаушылар отырғышы жағынан салонды тесіп кіріп кеткенін байқауға болады, ал қазіргі уақытта көлік арнайы тұраққа қойылып, тиісті тергеу амалдары жүргізіліп жатыр.
«Алдын ала мәліметтер бойынша Hyundai Tucson жүргізушісі қисық темір қоршау түріндегі кедергіге соғылған», – деді полиция ведомствосының өкілдері.
Оқиға кезінде Астанадан Павлодардағы ата-анасына «Яндекс» қосымшасы арқылы такси шақыртып бара жатқан студент ең ауыр жарақат алған. Оның жақындары бұл апат Төртқұдық ауылының маңындағы жөндеу жұмыстары жүріп жатқан аймақта болғанын атап өтті.
«Ол жерде жол белгілері орнатылып, біржақты қозғалыс ұйымдастырылған болатын, алайда жүргізуші қатты жылдамдықпен келіп қоршауға соғылды. Досымыз оқиға орнында оң аяғынан айырылып, көп қан жоғалтты, ал жедел жәрдем ішінде жүрегі тоқтап қалғанымен дәрігерлер оны аман алып қалды. Ауруханада оның екінші аяғын кесті, қазір ол реанимацияда комада жатыр», – деді зардап шегушінің достары.
Зардап шеккен жігіттің туыстары бұл істің әділ әрі объективті тергелетініне үміттеніп отыр.
