2026 жылы қасиетті Рамазан (Рамадан) айы 19 ақпанда басталады. Бұл туралы Қазақстан мұсылмандары діни басқармасы (ҚМДБ) жариялаған діни күнтізбеде көрсетілген. Рамазан айына қатысты негізгі даталар мен маңызды талаптарды төменде жинақтадық.
Рамазан айы қашан басталып, қашан аяқталады
Рамазан — мұсылмандар үшін рухани тазару, сабыр мен өзін тәрбиелеу кезеңі. Бұл айда мүміндер ораза ұстап, дұға-тілекке, қайырымдылық пен игі амалдарға ерекше көңіл бөледі.
ҚМДБ мәліметінше, 2026 жылы Рамазан айы 19 ақпанда басталады. Ай күнтізбесіне байланысты ораза 29 немесе 30 күнге созылады. Ал қасиетті айдың аяқталуы мен Ораза айт мерекесі 20 наурызға сәйкес келеді.
Рамазан айында кімдер ораза ұстамайды
Ислам дінінің қағидаларына сәйкес, кейбір санаттағы азаматтар ораза ұстаудан босатылады. Олардың қатарында:
• жүкті және бала емізетін әйелдер;
• сырқаты бар және жасы үлкен адамдар;
• жеті жасқа толмаған балалар;
• сапарда жүрген жолаушылар мен қызметтік міндетін атқарып жүргендер бар.
Қадір түні 2026 жылы қашан өтеді
Рамазан айындағы ең қасиетті түн — Қадір түні. Ислам сенімінде дәл осы түні пайғамбар Мұхаммедке (с.а.с.) Құранның алғашқы аяттары түсе бастаған деп айтылады.
2026 жылы Қадір түні 16-нан 17 наурызға қараған түнге сәйкес келеді. Бұл түні жасалған құлшылық пен оқылған дұғаның сауабы еселенеді деп есептеледі.
Рамазан айында не істеуге болмайды
Ораза ұстайтын мұсылмандар таң атқаннан күн батқанға дейін бірқатар әрекеттерден бас тартуы тиіс. Атап айтқанда:
• тамақ жеу және су ішу;
• темекі шегу;
• өтірік айту, өсек тарату, боқтық сөздер;
• күндізгі уақытта жыныстық қатынасқа түсу;
• ашу-ыза мен агрессия таныту.
Бұл шектеулер адамның өзін-өзі бақылауын күшейтуге және рухани тазалыққа қол жеткізуге бағытталған.
Рамазан айына қалай дайындалған жөн
Мамандар Рамазанға дайындықты алдын ала бастауды ұсынады. Ол үшін ниетті дұрыстау, өткен қаза оразаларды өтеу, тамақтану тәртібін жеңілдету және дін талаптарымен танысып шығу маңызды. Сондай-ақ ащы, майлы тағамдардан, кофе мен газдалған сусындардан бас тарту ағзаны оразаға дайындауға көмектеседі.
Құрбан айт 2026 жылы қай күндері өтеді
ҚМДБ деректеріне сәйкес, 2026 жылы Құрбан айт 27–29 мамыр аралығында аталып өтеді. Бұл мереке Ибраһим пайғамбардың (ғ.с.) оқиғасына байланысты және құрбандық шалу ғибадатымен ерекшеленеді. Құрбандыққа шалынған малдың еті мұқтаж жандарға үлестіріледі.
Қазақстандағы мұсылман мерекелерінің негізгі күндері – 2026 жыл
• Рамазан айы: 19 ақпан
• Қадір түні: 16–17 наурыз
• Ораза айт: 20 наурыз
• Құрбан айт: 27–29 мамыр
ҚМДБ ислам мерекелерінің нақты күндері жаңа айдың көрінуіне байланысты бір күнге өзгеруі мүмкін екенін ескертеді.
