Шығыс Қазақстан облысының тұрғындарына аз уақыт ішінде 130 миллиард теңге көлемінде зейнетақы мен жәрдемақы төленді. Қазіргі таңда аймақта әлеуметтік көмек алатын 243,8 мыңнан астам адам бар. Бұл деректер биылғы бірінші маусымдағы есеп бойынша тіркелген. Еңбек және халықты әлеуметтік қорғау вице-министрі Бахтияр Жазықпаевтың өңірге жасаған жұмыс сапары барысында осы сандарға ерекше назар аударылды, деп хабарлайды ozgeris.info сайты.
Ведомство басшысының орынбасары Жастар ресурстық орталығында жергілікті жұртшылықпен кездесті. Басты әңгіме мемлекеттік саясаттағы адам факторына бұрылды. Мемлекет басшысы еліміздің ең негізгі құндылығы адам екенін үнемі айтып келеді. Сондықтан әлеуметтік қолдау жүйесі барынша тиімді жұмыс істеп, қаражат мұқтаж жандарға тікелей жетуі тиіс. Бұл бағытта мемлекеттік қызметтерді қолжетімді ететін жаңа цифрлық шешімдер белсенді түрде енгізіліп жатыр.
Соның бір жарқын мысалы "Электронды еңбек биржасы" порталындағы жасанды интеллект көмекшісі. Жаңа технология жұмыс іздеушілер мен жұмыс берушілердің байланысын нығайтады. Жүйе бос жұмыс орындары мен оқу курстарын автоматты түрде таңдап береді.
Аймақта еңбекпен қамту шаралары қарқынды жүріп жатыр. Бүгінге дейін облыста 6,1 мыңға жуық адам тұрақты табыс көзін тапты. Оның ішінде 1781 азамат Президенттің "10 мың тұрғынға 100 жұмыс орны" бастамасы аясында еңбекке араласты. Вице-министр Ұлан ауданына қарасты Қасым Қайсенов кентіндегі Мансап орталығының жұмысымен танысып, осы бағыттағы нақты істерді бағамдады.
Сапар барысында "Жанұя" отбасын қолдау орталығы мен Белсенді ұзақ өмір сүру орталығы да назардан тыс қалмады. Мұнда халықтың әлеуметтік осал топтарымен жұмыс істеуді жақсарту және аға буын өкілдерінің өмір сапасын арттыру мәселелері талқыланды.
Жиын соңында Бахтияр Жазықпаев азаматтарды жеке қабылдады. Тұрғындардың мұң-мұқтажы мен ұсыныстарын тыңдап, әрбір сауалға жан-жақты жауап берді. Қосымша уақытты қажет ететін күрделі мәселелерді министрлік өкілі тікелей өз бақылауына алды. Тиісті департаменттерге заң шеңберінде тұрғындардың түйінді мәселелерін шешуге жәрдемдесу жөнінде нақты тапсырмалар жүктелді.
