Бостандық ауданының тұрғындарымен кездесуде Алматы әкімі Ерболат Досаев таулы аймақта тұрғын үй кешендерін салуға тыйым салғаны үшін қарсыластары көбейгенін айтты.
Ерменсай шағынауданында көпқабатты тұрғын үйлердің құрылысы туралы сұрақтарға жауап берген мегаполис басшысы соңғы бірнеше жылда жобаларды мақұлдаудан бірнеше рет бас тартқанын атап өтті.
«Белгілі бір ауданда тұрғын үй кешендерінің құрылысын заңнамалық тұрғыда тоқтатуға мораторий енгізу мүмкін емес. Бірақ біз бұл мәселелерді реттеп отырмыз, сіздер соңғы жылдары қанша жобаны мақұлдамай тастағанымызды білмейсіздер. Қаланың ішінде маған қарсы шыққандар көбейді, өйткені мен тау бөктерінде құрылыс жүргізуге рұқсат бермеймін», – деді Ерболат Досаев.