Мемлекет басшысы Қасым-Жомарт Тоқаев Қаржылық мониторинг агенттігінде (АФМ) өткен кеңесте елдің экономикалық және қаржылық қауіпсіздігіне төнген бірқатар өзекті мәселені көтерді. Бұл туралы Оzgeris.info сайты Ақорда-ға сілтемемен хабарлайды.
Президенттің айтуынша, қылмыскерлер өз әрекеттерінде жасанды интеллектіні кеңінен қолдана бастаған. Ал құқық қорғау және арнайы органдардың бұл үдерістен артта қалуы ұлттық қауіпсіздікке тікелей қауіп төндіреді.
Сондай-ақ Мемлекет басшысы капиталды шетелге заңсыз шығару әрекеттері әлі де тоқтамағанын атап өтті. Әсіресе криптовалюта арқылы қаржы шығару және әлеуметтік саладағы бюджет қаражатын жымқыру деректері алаңдаушылық тудырады.
Қасым-Жомарт Тоқаев жасанды интеллектіні шектен тыс қолдану кадрлардың кәсіби дайындығына кері әсер етіп жатқанын айтты. Оның сөзінше, кейбір қызметкерлер өз баяндамаларын да жасанды интеллектке жаздырып, дербес ойлау мен жауапкершіліктен алыстап барады.
Президент АФМ қызметкерлерінен жемқорлықты, ашкөздікті және сауатсыздықты жоққа шығаратын шынайы патриотизм күтетінін жеткізді. Мемлекет басшысының пікірінше, сауатсыз әрі жемқор адам патриот бола алмайды.
Кеңес барысында Агенттіктің бизнеспен өзара іс-қимылын өзгерту қажеттігі де айтылды. Президент кәсіпкерлік қызметке кедергі келтіруді мемлекеттік мүддеге қарсы ауыр заңбұзушылық деп атады.
Сонымен қатар заңсыз капитал әкету ел экономикасына зор қауіп төндіретіні атап өтілді. Кейбір сатушылар салықтан жалтару үшін екі түрлі баға белгілеп, қолма-қол есеп айырысу кезінде табысын жасыратыны айтылды.
Мәліметке сәйкес, көлеңкелі криптооперациялар арқылы қылмыстық кірістерді заңдастыру және капиталды сыртқа шығару фактілері анықталған. Соңғы уақытта 130 заңсыз криптобиржа жабылып, олардың айналымы 62 млрд теңгені құраған. 2,6 млрд теңгенің мүлкі тәркіленген. Алайда әлеуметтік желілерде криптовалюта айырбастау қызметтерінің жарнамасы әлі де жалғасуда.
АФМ 140 қылмыстық істі әшкерелеп, 15 мың сайт пен 123 қаржылық пирамиданың чатын бұғаттаған. Дегенмен алаяқтар пирамидаларды түрлі қаржы құралдары ретінде жасырып, азаматтарды алдауды жалғастырып келеді.
Осыған байланысты Президент қаржылық пирамидаларды ұйымдастырушыларға қатысты қылмыстық жауапкершілікті күшейтуді ұсынды. Сондай-ақ есірткі саудагерлерінің мүлкін, оның ішінде үшінші тұлғалардың атына рәсімделген активтерін тәркілеу аясын кеңейту және қылмыстық кірістерді заңдастырғаны үшін заңды тұлғалардың жауапкершілігін арттыру қажеттігін айтты.
