Қазақстанның май өнімдері экспорты толайым табысқа жетіп, тоғыз жүз қырық төрт миллион долларды құрады. Еліміз Өзбекстанға өсімдік майын тасымалдаудан қатарынан екінші жыл көшбасшылық орнын сақтап қалды, деп хабарлайды ozgeris.info сайты.
Екі мың жиырма бесінші жылдың қыркүйегінен биылғы мамырға дейін көрші мемлекетке бес жүз елу үш мың тонна өнім жөнелтілді. Бұл алдыңғы маркетингтік маусыммен салыстырғанда отыз бір пайызға немесе жүз отыз бүтін оннан сегіз мың тоннаға артық. Екі мың жиырма бесінші жылдың қорытындысы бойынша Өзбекстан нарығындағы отандық өнімнің үлесі тоқсан пайыздан асты. Соңғы бес маусым қатарынан тұрақты өсім байқалады.
Тоғыз ай ішінде сыртқы нарыққа өсімдік майымен қатар шрот пен жмых шығарылды. Экспорттан түскен пайда екі мың жиырма төрт пен жиырма бесінші жылдардағы кезеңмен салыстырғанда елу төрт пайызға артты. Нақтырақ айтқанда қаржылық өсім үш жүз отыз бір миллион долларға тең болды. Ағымдағы маусым соңына қарай жалпы экспорт көлемі бір миллиард он бес миллион доллардан асады деген болжам бар.
Бұл жетістікке ішкі өңдеу саласының қарқынды дамуы тікелей ықпал етті. Қазіргі таңда Қазақстанда майлы дақылдарды өңдеу қуаты жылына бес бүтін оннан екі миллион тоннадан асады. Оның ішінде төрт бүтін оннан төрт миллион тоннасы күнбағыс өңдеуге тиесілі. Бұл көрсеткіш Өзбекстанның жалпы өңдеу қуатынан жеті жүз мың тоннаға жоғары. Екі мың жиырма сегізінші жылға қарай жаңа кәсіпорындар ашу жоспарланған. Осының арқасында отандық саланың қуаты жылына сегіз миллион тоннаға жетпек.
Қазір қазақстандық өнім әлемнің жиырмадан астам еліне тасымалданады. Мемлекет Орталық Азия елдерінің күнбағыс шротына деген сұранысын толық өтеп отыр. Күнбағыс майын экспорттаудан еліміз әлем бойынша алтыншы орынға табан тіреді. Алдағы уақытта жаһандық үздік үштікке кіріп, табыс көлемін екі миллиард долларға жеткізу мақсаты қойылған.
