Атырау облысында әлеуметтік қорғау саласындағы департаментті басқарған Бауыржан Асаиновтың мәйіті табылды, деп хабарлайды Ozgeris.info.
«Ақжайық» басылымның мәліметінше, ер адамның денесі 18 қазанда өзі тұрған пәтерден табылған. Оның қайтыс болғанын әріптестері де растаған. Олар ведомствоның ресми парақшасында көңіл айту жазбасын жариялады.
Алдын ала мәлімет бойынша, мәйіт пәтерде шамамен екі апта бойы жатуы мүмкін. Осы уақыт ішінде үйге жылу берілген. Бұл мәйіттегі өзгерістерді жеделдетіп, өлімнің нақты себебін анықтауды қиындатуы ықтимал.
Ақпарат көзінің хабарлауынша, марқұм мен оның ағасы арасында жанжал болған болуы мүмкін. Болжам бойынша, екеуі бірге ішімдік ішіп, кейін сөзге келген. Артынша ағасы Бауыржан Асаиновты ұрып, оның әлі тірі кезінде пәтерден кетіп қалған болуы мүмкін.
Алайда оқиғаға қатысты бұл мәліметтер әзірге ресми түрде расталған жоқ. Марқұмның ағасының қайда екені де белгісіз болған. Қазір жанжалдың мән-жайы мен ер адамның өліміне не себеп болғаны туралы нақты ақпарат жоқ.
Бауыржан Асаинов 2023 жылғы 4 қаңтардан бастап Атырау облысы бойынша Әлеуметтік қорғау саласындағы реттеу және бақылау комитетінің департаментін басқарған. Бұған дейін прокуратурада, Мемлекеттік қызмет істері агенттігінде және Индустрия және жаңа технологиялар министрлігінде қызмет атқарған. Сондай-ақ Денсаулық сақтау министрлігіне қарасты Санитариялық-эпидемиологиялық бақылау комитетінің ішкі қауіпсіздік басқармасын басқарған.
Айта кетейік, биыл мамыр айында Солтүстік Қазақстан облысының Ақжар ауданына қарасты Май ауылдық округінің әкімі Ерлан Смаиловтың да мәйіті табылған еді. Оның денесін танысы үйінің ауласындағы шаруашылық құрылыстан тапқан. Кейін әкімнің өзіне қол жұмсағаны туралы ақпарат тарады. Алайда оның мұндай қадамға баруына не себеп болғаны белгісіз.
Облыстық полиция департаменті мемлекеттік қызметкердің қайтыс болғанын растаған. Қазіргі уақытта оқиғаға қатысты тергеу жүргізіліп жатыр.
