АҚШ балуаны Бо Бассетт Астанада өтіп жатқан еркін күрестен әлем чемпионатында нағыз сенсация жасап, 65 келіге дейінгі салмақ дәрежесінде финалға шықты. Жас спортшының ересектер арасындағы басты додадағы өнері жанкүйерлердің назарын аударды, деп хабарлайды Ozgeris.info
Америкалық балуан бір күннің ішінде төрт белдесуде жеңіске жетіп, финалға дейінгі жолда бірнеше мықты қарсыласын жарыс жолынан шығарды. Алдымен Пейман Биабаниді мерзімінен бұрын жеңсе, одан кейін Квентин Стикерден 12:0 есебімен басым түсті.
Ширек финалда Бо Бассетт бұрынғы әлем чемпионы, тәжірибелі балуан Абасгаджи Магомедовпен кездесті. Бұл белдесу америкалық үшін нағыз мінез бен жігердің сыналған сәті болды. Есепте 3:12 есебімен ұтылып жатқан Бассетт таразы басын өз пайдасына аударып, 14:13 есебімен жеңісті жұлып алды.
Ал жартылай финалда Абдулмажид Кудиевке еш мүмкіндік қалдырмай, 12:2 есебімен айқын басымдық танытты. Осылайша, әлі жасөспірімдер санатынан жаңа шыққан талант ересектер арасындағы әлем чемпионатының финалына дейін жетті.
Бассетттің финалға шығуы – турнирдің басты жаңалықтарының бірі. Өйткені оның жолында әлемдік деңгейде мойындалған талай мықты балуан тұрды. Абасгаджи Магомедов секілді тәжірибелі қарсыласты жеңуі америкалық спортшының тек физикалық дайындығын ғана емес, психологиялық тұрғыдан да қаншалықты мықты екенін көрсетті.
Енді Бо Бассетт әлем чемпионатының алтын медалі үшін Ваген Теванянмен белдеседі. Жас америкалықтың алдында үлкен мүмкіндік тұр. Ол Астанадағы тарихи жеңіс арқылы әлемдік күрестегі жаңа есімге айнала ала ма? Финалдық белдесу осы сұраққа жауап береді.
