Алматыдан елордаға сапарлаған 12 жастағы Келдібек Нұрдәулеттің бағы жанды. Ол Астанадағы "Нұрлы жол" теміржол вокзалында үлкен қошеметпен күтіп алынды. Жасөспірім 2026 жылдың бес миллионыншы жолаушысы атанды деп хабарлайды ozgeris.info сайты.
Бақытты билет иесі №9/10 пойызбен әжесінің жанында келе жатқан. Пойыз бастығы жолаушыны арнайы құттықтап, ерекше құрмет көрсетті. Жас өренге су жаңа iPad гаджеті табыс етілді. Оған қоса сымсыз құлаққап пен жеміс-жидекке толы үлкен себет сыйға тартылды. Ұлттық тасымалдаушының бұл ілтипаты әже мен немерені қатты қуантты.
Жеңімпазды жол жүру құжаттарын есепке алу және ресімдеу жүйесі автоматты түрде анықтап берген.
Күтпеген тосынсыйға тап болған зейнеткер мұндай жылы қабылдауды мүлдем ойламаған. Бұл отбасы сапар барысында ұдайы осы пойызды таңдайды. Олар "Жолаушылар тасымалы" акционерлік қоғамының ұжымына қамқорлығы үшін риясыз алғысын білдірді.
Бұл игі шара дәстүрлі түрде өткізіліп тұрады. Ұлттық тасымалдаушы "Kaztechnology" серіктестігімен бірлесіп мерейтойлық жолаушыларға ұмытылмас сыйлықтар үлестіреді.
