Ұлытау өңірі елдегі мыс өнеркәсібінің тарихи орталығы саналады. Дәл осы аймақта "Қазақмыс" компаниясы геологиялық барлау жұмыстарын күрт күшейтті. Минералдық-шикізат қорын дамыту басты стратегиялық бағытқа айналып отыр, деп хабарлайды ozgeris.info сайты.
Биыл бұл мақсатқа бөлінген қаржы еселеп өсті. Бұрын ізденіс жұмыстарына жылына 5 миллион доллар жұмсалса, қазір инвестиция көлемі 40 миллион долларға жетті. Бұл қаражат Жезқазған кен алабының терең қабаттарын зерттеуге және жаңа учаскелерді табуға жұмсалады.
Техниканы есепке алмағанда кен орындарының қапталдары мен терең қабаттарын зерттеу жобаларына 2,27 миллиард теңге құйылды. Жүйелі ізденіс бірден өз жемісін берді. Нәтижесінде көлемі 63,5 миллион тонна кенді құрайтын үлкен резервтік қор қалыптасты. Оның ішінде 620,3 мың тонна мыс пен 12,9 тонна алтын бар. Табылған байлықтың басым бөлігі мемлекеттік балансқа тіркеліп үлгерді.
Жезқазған компанияның іздеу бағдарламасындағы үш басты бағыттың бірі. Бұған дейін пайдалану мақсатындағы бұрғылау жылына 63 мың қума метрді құраған еді. Биыл тек Жезқазған бағытында барлау мақсатында 62,4 мың қума метр жерді бұрғылау жоспарланған. Яғни жалпы жұмыс ауқымы екі есеге ұлғайды.
Бұл ауқымды істі атқару үшін өңірде алты заманауи жерүсті бұрғылау қондырғысы іске қосылды. Жерүсті жұмыстарына арналған екі техника күрделі жөндеуден шықты. Сонымен қатар жалпы құны 1,3 миллиард теңге тұратын үш жерасты бұрғылау агрегаты мен қосалқы техникалар сатып алынуда. Жұмысшы бригадаларға қолайлы жағдай жасалып, инфрақұрылым жаңартылып жатыр. Мамыр айында қосымша күштер тартылып, шілдеге қарай өндірістік алаңдарда онға жуық қондырғы толық жұмысқа кіріседі.
Былтырғы геофизикалық зерттеулердің негізінде үш перспективалы учаскеде қазу басталды. Оңтүстік Итауыз, Соркұдық-Жартас және Жыланды кен орындарында қосымша зерттеулер жүргізіледі. Тереңге бойлау арқылы Жезқазғанның геологиялық құрылымы мен жасырын кен денелері туралы тың деректер табылады.
Ізденіс барысында заманауи цифрлық технологиялар кеңінен қолданылуда. Геологиялық бөлімшелер кен орындарының үшөлшемді моделін жасайтын Micromine жүйесіне көшті. Бұл бағдарлама қазылған деректерді өте дәл анықтауға көмектеседі. Осы жаңа бағыт бойынша 177 маман арнайы оқудан өтті. Болашақта цифрлық жүйені меңгерген қызметкерлер саны 401 адамға дейін көбейеді.
Ұлытау жеріндегі барлау ауқымының кеңеюі тікелей аймақтың болашағына салынған үлкен үлес. Жаңадан табылған қорлар өндіріс орындарын тұрақты жүктемемен қамтамасыз етеді. Тұрғындар үшін ұзақ мерзімді жұмыс орындары сақталып, тау-кен металлургия кешені бұдан әрі қарай дами түседі.
