ФИФА президенті Джанни Инфантиноның кезекті мерзімге қайта сайлану мүмкіндігі арта түсті. Солтүстік және Орталық Америка мен Кариб бассейні футболын басқаратын КОНКАКАФ конфедерациясының президенті Виктор Монтальяни ФИФА басшысы лауазымына үміткер болмай, өз қызметінде қалуды көздеп отыр. Бұл туралы BBC Sport басылымының спорт редакторы Дэн Роан, футбол жаңалықтарының бас тілшісі Саймон Стоун және футбол мәселелері жөніндегі тілшісі Дейл Джонсон мәлімдеді, деп хабарлайды Ozgeris.info
61 жастағы канадалық Виктор Монтальяни Джанни Инфантиноға ықтимал қарсыластардың бірі ретінде қарастырылған еді. Әсіресе ФИФА басшысының әлем чемпионатына қатысты құқықтарды жеке инвесторларға сату жоспары қарсылыққа ұшырағаннан кейін оның кандидатурасы жиі талқыланды. Алайда Монтальяни Инфантиноға қарсы сайлауға түсетінін ешқашан ресми түрде мәлімдеген емес.
Дереккөздердің мәліметінше, ол әріптестеріне КОНКАКАФ президенті қызметіне соңғы мерзімге қайта сайлануға ниетті екенін жеткізген. Бұл оның 2027 жылғы наурызда өтетін ФИФА президентін сайлау науқанына қатыспайтынын білдіреді.
56 жастағы Джанни Инфантино төртінші мерзімге сайлануға ұмтылып отыр. Енді оған қарсы шығуға ниетті Еуропалық футбол қауымдастықтары одағы (УЕФА) бастаған күштер 18 қарашаға дейін ортақ кандидат табуы қажет. Әзірге Инфантиноға қарсы тұратын нақты үміткер анықталған жоқ.
Чеферин УЕФА президенттігіне қайта түседі
Осы уақытта УЕФА президенті Александр Чеферин ұйым басшысы қызметіне төртінші мерзімге үміткер болатынын мәлімдеді. Словениялық функционер бұл шешімін Берлинде өткен УЕФА-ға мүше 55 ұлттық футбол қауымдастығы басшыларының кездесуінде делегаттарға жеткізген. Чефериннің бұл қадамы көпшілік үшін күтпеген жағдай болған жоқ. Ол 2024 жылғы ақпанда президенттікке қайта түспейтінін айтқан еді. Алайда соңғы уақытта оның өз шешімін өзгертіп, сайлауға қатысатыны жөніндегі болжам күшейген.
2016 жылы алғаш рет УЕФА президенті болып сайланған Чеферин бұған дейін ұйым жарғысына енгізілген өзгерістерге байланысты сынға ұшыраған. Аталған өзгерістер оған төртінші мерзімге сайлануға мүмкіндік берген болатын.
«Ұлттық қауымдастықтарға сенім білдіргені үшін алғыс айтамын. Соңғы жылдары біз ерекше қиындықтарға тап болдық және оларды бір команда ретінде еңсердік. Алда әлі де маңызды жұмыстар бар, сондықтан олардың өтінішін қабылдадым», – деді Чеферин.
Ол өзінің басты мақсаты Еуропа футболының бірлігін сақтау, футболды дамыту және УЕФА-ны келесі буынға дайын ұйым ретінде қалдыру екенін атап өтті. Сонымен бірге Чеферин Инфантиноға қарсы тікелей үміткер болмайтынын айтқанымен, наурыздағы ФИФА президенті сайлауында футбол әлемін біріктіре алатын кандидат табуға күш салмақ.
UEFA FIFA-ны реформалауды талап етті
Берлиндегі кездесуде УЕФА және оған мүше 54 ұлттық қауымдастық ФИФА-ны реформалаудың негізгі бағыттары бойынша ортақ ұстанымға келген. Әзербайжан бұл келісімге қосылмаған.
УЕФА жариялаған 14 тармақтан тұратын жоспар ФИФА-ның басқару жүйесін өзгертуге бағытталған. Ұйым президенттің тікелей өкілеттіктерін шектеуді, этика мен тәртіп мәселелеріне жауапты бақылау органдарының тәуелсіздігін қамтамасыз етуді және президенттің немесе атқарушы органдардың олардың жұмысына араласуына жол бермеуді ұсынады. Сондай-ақ УЕФА ФИФА қаражатын жеке мүдделер мен сайлау науқаны үшін пайдалануға қарсы екенін мәлімдеді. Бұған қоса, ұйымға мүше 211 ұлттық қауымдастықтың әрқайсысына қосымша кемінде 10 миллион доллар қаржы бөлуді ұсынды.
УЕФА реформалармен қатар ФИФА-ға жаңа басшылық қажет екенін де атап өтті. Ұйымның пікірінше, футбол әлеміне әртүрлі аймақтардың сеніміне ие, беделді әрі біріктіруші, спорттың дамуына, реформаларға, адалдық пен тәуелсіздікке басымдық беретін тұлға қажет.
Бұған дейін, тамыз айында, УЕФА, КОНКАКАФ және Азия футбол конфедерациясы (AFC) бірлескен ашық хат жариялап, Инфантиноны «алдау арқылы сенімге қиянат жасады» деп айыптаған болатын. Алайда соңғы уақытта AFC президенті Шейх Салман бин Ибрахим әл-Халифаның Инфантиноға қатысты ұстанымы жұмсарғаны байқалады.
Инфантиноға қарсы кім шыға алады?
Қазіргі уақытта ФИФА президенттігіне Инфантиноға қарсы түсетін ресми кандидат жоқ. Бұрынғы «Тоттенхэм» мен Швейцария құрамасының қорғаушысы Рамон Вега сайлауға қатысу ниетін білдіргенімен, оның кандидатурасын тіркеуге қажетті қолдауға ие бола алатыны белгісіз. Сайлауға қатысу үшін үміткерге бес қолдау хаты қажет.
Осылайша, Виктор Монтальянидің президенттікке таласудан бас тартуы Инфантиноның позициясын нығайта түсті. Дегенмен УЕФА бастаған реформалық қозғалыс оған қарсы ортақ кандидат іздеуді жалғастырады. ФИФА басшысының төртінші мерзімге сайлану-сайланбауы алдағы апталарда оппозицияның кімнің төңірегіне топтасатынына да байланысты болмақ.
