Бір жылдан астам уақыт бойы «Жаңа адамдар» қозғалысының 124 азаматтық науқаны кәмелетке толмағандарға қызығушылық танытатын әлеуетті педофилдерді анықтау бағытында жүйелі жұмыс жүргізіп келеді. Науқан аясында белсенділер әлеуметтік желілерде балалардың атынан аккаунттар құрып, жасөспірімдермен әдейі байланыс орнататын ересек ер адамдарды анықтауға тырысады деп мәлімдейді Оzgeris.info.
Кезекті азаматтық эксперимент барысында 13 жасар қыздың бейнесінде қарапайым профиль жасалған. Арандатушылық сипаттағы ешбір контент жарияланбағанына қарамастан, бұл аккаунт қысқа уақыт ішінде ересек ер адамдардың назарын аударған.
Олардың ішіндегі ең табандысы — 2000 жылы туған Сабиров Саруар. Ол хат алмасу кезінде баланың жасын анық түсінгенін, алайда жас айырмашылығы маңызды емес екенін айтқан. Сонымен қатар, ол жеке кездесу кезінде шындықты жасыруды ұсынып, адамдардың көзінше өзін қыздың қарындасы ретінде көрсетуін талап еткен.
Кездесу алдын ала дайындалған квест-бөлмеде ұйымдастырылды. Белгіленген уақытта ол жерге келген Саруарды «Жаңа адамдар» қозғалысының белсенділері қарсы алып, хат алмасу жазбалары, ниеттері мен әрекеттерін растайтын барлық дәлелдерді ұсынды. Кездесу барысында ол камерадан қашып, бетін қолымен жауып, анонимділігін сақтауға тырысқан.
Белсенділердің айтуынша, дәл осы сәтте ол өзінің негізгі «қорғанышынан» жасырын болу мүмкіндігінен айырылған. Жиналған барлық материалдар заң аясында рәсімделіп, әрі қарай тиісті органдарға тергеу жүргізу үшін тапсырылған.
Бұл оқиғаға қатысты «Жаңа адамдар» қозғалысының өкілі Алтынай Калиева пікір білдірді:
«Педофилия — жекелеген оқиға емес, ол қоғам назар аудармаған кезде тамыр жаяды. Мұндай жағдайда әр адам екі жолдың бірін таңдайды: көрмегендей болып, үнсіз қалу немесе айналасында болып жатқан жағдайға бейжай қарамай, “Бұл маған қатысты” деп жауапкершілік алу», — деді ол.
Қозғалыс өкілдері азаматтарды балалардың қауіпсіздігіне қатысты кез келген күмәнді жағдайға немқұрайлы қарамауға және құқық қорғау органдарына дер кезінде хабар беруге шақырды.
