Танымал актер, асаба, «Күлкі базар» театрының басшысы Ғалымжан Қалыбаевтың әйелдер жайлы айтқан ойы желіге тарап кетті. Өнер иесінің «Жағың сынса да, сағың сынбасын» подкастындағы сөзі қоғамда қызу талқыға түсті, деп жазды nur.kz.
Бағдарлама жүргізушісі актерден «Саясатқа қатысты сұрақ қояйын. Сізді көбісі біледі. Әзілдеріңіз тоқал алу, көп әйел алуға қатысты. Басшымыз қыз алып қашу, көп әйел алуға тыйым салу жайлы айтты. Бұл жайлы өз ойыңыз қалай?», – деп сұрады.
Ал Ғалымжан Қалыбаев бұл нәрсеге түбегейлі қарсы екенін айтты.
«Менің пікірім теріс. Мен ғана емес, бүкіл халық айтылған сөздерге қарсы болып жатыр. Бүкіл демей-ақ қояйын, 99,9 пайыз халық қарсы. Қолдап отырғандар да бар шығар. «Көп әйел алуға тыйым салу керек» деп еді, әйелдердің жаны кіріп қалды. Олар ар жағын ойлап отырған жоқ. Атам қазақ «Әйелдің шашы ұзын, ақылы қысқа» деп айтады. Ер адамның 10 жылға, 20 жылға, 50 жылға қойған жоспарын әйел адам ойлай алмайды. Оның бүгінгі тамағы, ертеңгі шайы болса, ар жағын ойлай алмайды. Алла солай жаратқан, мен кемсітіп жатқан жоқпын. Әйел заты – кеміс, жарымес деп отырған жоқпын. Ата-бабам соны көріп, бекер айтқан жоқ.
Әйелдердің жаны кіріп отырғаны, бір күйеуі өзіне қалатын болды. Күйеуін баласы секілді меншіктеп алды. Күйеуім өзімдікі, ешкіммен бөліспеймін деп отыр. Есесіне, ертең жезөкшелер көбейеді. Бір жыныстылар мен зина көбейеді. Рас қой. Сосын қытайға, кәпірге, үндіске, қара нәсілдіге тұрмысқа шығу басталады. Мен алмасам, сен алмасаң, ол байғұс қыздар қайда барады? Отырып қалған қыздар, жесірлер, ажырасқан әйелдер қайда барады? Кім алады? Нәзік жандылар ғой олар. Қорғауымыз керек қой. Солар барады да, қытайға тиеді, басқаға тұрмысқа шығады.
Сосын солардан туған бала азаматтық алады. Қызық сол кезде басталады. Атам қазақ «Жиен – ел болмас, желке – ас болмас» деген. Жиен ешқашан ел болмайды. Жиен менің тегімді алмайды, менің мүддемді қорғамайды. Қазақ болса, дұрыс. Қорғасын! Ал ертең 50 млн қытайдың жиені келіп, қазақты елінен бездіріп жібереді. Ертең шығайын деп отырған заң көп әйелді тоқтату керек дегенім осы. Мен түбегейлі қарсымын. Мен президент болсам, «Қазақтың қыздарына қамқор болыңдар» дер едім. Ажырасып кету, қайта үйлену болады», – деді Ғалымжан Қалыбаев.
Актердің бұл сөзі түрлі әлеуметтік желіге тарап, қоғамның қызу талқысына түсті. Көпшіліктің бірі актерді қолдаса, екіншілері оның сөзіне қарсы шықты.
фото: видеодан скриншот