Бүгін Астанада Жоғары Еуразиялық экономикалық кеңестің аса маңызды отырысы өтеді. Кездесудің басты мақсаты – интеграциялық басымдықтарды нақтылау және ортақ нарықтың жұмысын реттейтін шешімдерді бекіту. Қазақстан үшін бұл экономикалық механизмдерді жетілдіруге бағытталған өз ұсыныстарын енгізіп, ынтымақтастықтың негізгі бағыттары бойынша нақты ұстанымын білдіруге үлкен мүмкіндік деп хабарлайды ozgeris.info сайты.
Кеше ғана бесінші Еуразиялық экономикалық форумның пленарлық отырысы өтіп, онда жасанды интеллект пен цифрлық технологиялардың одақ экономикасына әсері қызу талқыланды. Қатысушылар жасанды интеллект өнеркәсіптің даму қарқынына, логистиканы жаңғыртуға және жаңа сауда модельдерін қалыптастыруға тікелей ықпал ететінін алға тартты. Демек, бұл тақырыптар бүгін мемлекет басшылары деңгейінде қаралатын мәселелермен тығыз байланысты.
Жиынға қатысатын мәртебелі меймандар:
-
Қазақстан Президенті Қасым-Жомарт Тоқаев
-
Ресей Президенті Владимир Путин
-
Беларусь Президенті Александр Лукашенко
-
Қырғызстан Президенті Садыр Жапаров
-
Арменияның Вице-премьері Мгер Григорян
Мұндай жоғары деңгейдегі формат саяси келісімді қажет ететін және экономикалық саясатты үйлестіруге тікелей әсер ететін түйткілдерді талқылауға жол ашады. Негізгі назар ортақ нарықтың жұмысын қамтамасыз ететін құралдарды жаңартуға аударылмақ. Одаққа мүше мемлекеттер цифрлық шешімдердің тиімділігін арттырып, сауда ағындарын болжауды жақсартуы қажет. Сондай-ақ тауар қозғалысына үлкен кедергі келтіретін ұлттық талаптардағы айырмашылықтарды барынша азайту міндеті тұр.
Сарапшылар бұл басқосудан алдағы жылдарға арналған нақты жоспарлар күтеді. Егер механизмдерді жаңғырту және кооперацияны дамыту бойынша ортақ шешімдер келісілсе, бұл бизнес үшін нақты бағдарлар қалыптастырады.
Ең бастысы, халықаралық қатынастардағы күрделі дағдарыс уақытында Қазақстан мемлекет басшылары деңгейіндегі жиынды өз жерінде өткізу арқылы өзіне тиімді күн тәртібін жасақтап отыр. Бұл еліміздің стратегиялық маңызын айқындай түседі.
