Қазақстан футзалдан 2030 жылғы Еуропа чемпионатының финалдық кезеңін өткізуге ниетті. Алайда бұл жолда еліміз Испания, Франция және тағы төрт мемлекеттің құрамаларымен емес, турнирді ұйымдастыруға таласатын ұлттық қауымдастықтармен бәсекеге түседі, деп хабарлайды Ozgeris.info
Қазақстан футбол федерациясы (ҚФФ) 2030 жылғы футзалдан Еуропа чемпионатын қабылдауға қызығушылық білдірді. Еуропалық футбол қауымдастықтары одағының (УЕФА) мәліметінше, биылғы іріктеу кезеңінде турнирді өткізуге рекордтық жеті ел өтінім берген.
Қазақстаннан бөлек, Испания, Хорватия, Франция, Финляндия, Грузия және Польша құрлықтық доданы қабылдауға үміткер болып отыр. УЕФА бекіткен рәсімге сәйкес, үміткер елдер соңғы өтінім құжаттарын 2027 жылғы 8 маусымға дейін тапсыруы тиіс. Ал футзалдан 2030 жылғы Еуропа чемпионатын қабылдайтын мемлекет сол жылдың қыркүйек айында УЕФА Атқарушы комитетінің отырысында анықталады.
Айта кетейік, Қазақстан соңғы жылдары халықаралық футбол додаларын өткізуге белсенді түрде ұмтылып келеді. 2027 жылы Астана қаласында УЕФА-ның 51-конгресі өтеді. Ал 2028 жылы елордадағы «Астана Арена» стадионында УЕФА Суперкубогы үшін матч ұйымдастырылады. Егер Қазақстан 2030 жылғы футзалдан Еуропа чемпионатын өткізу құқығына ие болса, бұл еліміздің халықаралық спорттық беделін арттырып, отандық футзалдың дамуына тың серпін беретін маңызды оқиға болмақ.
