Қазақстандық продюсер Баян Алагөзова қоғамдағы әйелдердің рөлі мен мәртебесіне қатысты өз пікірін білдірді. Ол ер азаматтардың «төрт әйел алу керек» деген көзқарасын сынға алып, мұндай ұстанымның бүгінгі заман талаптарына сай келмейтінін айтты, деп хабарлайды Оzgeris.info.
Продюсердің айтуынша, отбасында да, қоғамда да бір тараптың үстемдігі болмауы керек. Әйел адам тек үй шаруасымен шектелмей, өзін дамытуға, білім алуға және кәсіби тұрғыда өсуге толық құқылы.
Баян Алагөзова әйел затының өз ойын ашық жеткізе алатын, дербес шешім қабылдайтын тұлға ретінде қабылдануы маңызды екенін атап өтті. Оның пікірінше, ер мен әйел арасындағы қарым-қатынас өзара сыйластыққа, теңдікке және ортақ жауапкершілікке негізделуі тиіс.
«Берік отбасы үшін екі тарап та тең дәрежеде шешім қабылдап, бірдей жауапкершілік алуы қажет», – дейді продюсер.
Желі қолданушылары Баян Алагөзованың бұл пікірін қызу талқылап, қолдау білдіруде. Әсіресе әйелдер қауымы оның батыл мәлімдемесін оң қабылдап, қоғамда әйел мәртебесін арттыру қажеттігін алға тартты.
Айта кетейік, Баян Алагөзова бұған дейін де әлеуметтік тақырыптарда ашық пікір білдіріп, әйелдердің құқығы мен мүмкіндіктерін қорғау мәселесін жиі көтеріп келеді.
