Ақмола облысында Төтенше жағдайлар министрлігінің қызметкерлері судағы ықтимал қайғылы жағдайдың алдын алды. Бұған дейін күндіз құтқарушылар мұз астына батып кеткен балықшыны аман алып шықса, сол күні түнде тағы бір қауіпті оқиға тіркелген деп хабарлайды ozgeris.info сайты.
Оқиға Буланды ауданы, Купчановка ауылының маңындағы Қайракты өзенінде болған. Жақын маңда кезекшілік атқарып жүрген құтқарушылар қараңғы уақытта өзенге шығуға әрекеттенген ер адамды байқайды.
Азамат қатты ағысы бар өзенге резеңке қайықпен шықпақ болған. Алайда оның құтқару жилеті болмаған, ал ауа райы мен гидрологиялық жағдайлар өміріне айтарлықтай қауіп төндірген.
ТЖМ қызметкерлері дер кезінде араласып, ер адамның суға шығуына жол бермеген. Алдын алу әңгімесінен кейін азамат өз ниетінен бас тартып, үйіне оралған.
Ведомство өкілдері тұрғындарды судағы қауіпсіздік талаптарын қатаң сақтауға шақырады. Қараңғы уақытта және қолайсыз ауа райында су айдындарына шығу адам өміріне үлкен қауіп төндіретіні ескертілді.
