Алматы облысында қызметтік тапсырмамен жолға шыққан құтқарушы жол-көлік апаты салдарынан көз жұмды. Бұл туралы Оzgeris.info сайты kznews.kz сайтына сілтеме жасап хабарлайды.
Қайғылы оқиға 12 желтоқсанда Алматы–Қапшағай–Бақанас автожолында болған. Төтенше жағдайлар департаментіне тиесілі УАЗ маркалы қызметтік автокөлік тайғақ жолда басқарудан шығып, аударылған. Көлік ішінде екі қызметкер болған.
Алдын ала мәліметке сәйкес, жүргізуші оқиға орнында қаза тапқан. Аман қалған жолаушы байланыс болмағандықтан, көмек шақыру үшін жаяу кеткен. Кейін оқиға орнына жеткен медицина қызметкерлері жүргізушінің қайтыс болғанын растады.
Марқұмның аты-жөні — Фархад Аманбаев. Оның туыстары апатқа қызметтік көліктің техникалық жағдайы себеп болды деп есептейді. Олардың айтуынша, көлік ескі, жарамсыз күйде болған және тіпті есептен шығарылған жедел жәрдем көлігінің бөлшектері пайдаланылған.
Жақындары ведомство басшылығын құтқарушыларды тозығы жеткен техникамен жолға шығарды деп айыптап отыр. Айғақ ретінде олар апатқа дейін түсірілген бейнежазбаларды, сондай-ақ қызметкерлердің көлікті өз қаражатына жөндегенін дәлелдейтін материалдарды ұсынған.
Қазіргі таңда аталған дерек бойынша тиісті органдар тексеру жүргізіп жатыр. Оқиғаның нақты себептері мен жауапты тұлғалар тексеру нәтижесінде анықталмақ.
