Қарағандыда полицейлер мен құтқарушылар суицидтің алдын алды: тоғызыншы қабаттағы балконнан секірмек болған ер адамды қайта пәтерге кіргізуге мүмкіндік туды, деп хабарлайды ozgeris.info сайты cmn.kz порталына сілтеп.
ҚР ІІМ баспасөз қызметінің хабарлауынша, оқиға Тәттімбет көшесінде болған. Куәгерлер тоғыз қабатты үйдің балконында ер адамның қоршаудың сыртында тұрғанын байқап, шұғыл қызметтерге хабар берген.
Құтқарушылар пәтердің есігін бұзып ашып, ішке кіруге тырысқан. Ал полицейлер ер адаммен байланыс орнатуға ұмтылды.
«Ол мазасыз күйде болды. Әріптестерім төменгі қабатта қауіпсіздікті қамтамасыз етіп жатқанда, мен оған балконға оралуға дер кезінде көмектесе алдым», – деді полиция қызметкері Әділет Әмірбеков.
39 жастағы азамат жедел жәрдем бригадасына тапсырылды. Қазір ол медициналық тексеруден өтіп жатыр, сондай-ақ психологиялық қолдау көрсетілуде. Мамандар оқиғаның себебін анықтап жатыр.
