Мұғалімдерге ақшаны қалай ұстау керектігін үйретпек

Қазақстанда мұғалімдердің қаржылық сауаттылығын арттыруға арналған жаңа жоба басталды. Оны Оқу-ағарту министрлігіне қарасты «Өрлеу» ұлттық орталығы Ұлттық банкпен бірлесіп іске асырады, деп жазады Ozgeris.info.

Бағдарламаның алғашқы кезеңінде «Өрлеу» мамандары Ұлттық банктің аймақтардағы 100 бөлімшесінің қызметкерлерін оқытады. Сабақтарда заманауи әдістер – коучинг, топтық жұмыс, талқылаулар қолданылады. Курстарда Қазақстандағы қаржы жүйесі, инвестиция негіздері және жеке қаржыны дұрыс басқару жайлы айтылады. Мұның бәрі мұғалімдердің бұл білімді оқушыларға түсінікті етіп жеткізуіне көмектеспек.

Негізгі кезең 2025 жылдың қыркүйегінде басталады. Сол кезде жалпы білім беретін мектеп пен колледждерден шамамен 6 мың мұғалім арнайы дайындықтан өтеді. Ал 2026 жылы тағы 4 мың педагог қамтылады. Бес күндік курс практикалық жаттығуларды да қамтиды, сондықтан мұғалімдер алған білімдерін күнделікті сабаққа енгізе алады.

Жоба аяқталған соң оқушылар мен студенттер ақшаны қалай дұрыс жұмсау, жинау, тәуекелден қорғану сияқты дағдыларды меңгереді. Ал мұғалімдер қаржылық пирамидалар мен алаяқтықтан сақ болуды үйретіп, қоғамның қаржылық тұрақтылығын арттыруға үлес қосады.

Айта кетейік, осыған дейін Қазақстанда әйелдерге қаржылық сауат пен жасанды интеллект негіздерін тегін үйрететін жоба іске қосылған болатын. Ол да 10 мың адамды қамтуды көздейді.