Елімізде жаңа мереке пайда болды

Елде биылдан бастап жаңа кәсіби мереке пайда болды. Еңбек және халықты әлеуметтік қорғау министрлігінің бұйрығымен 29 қазан Қазақстан кәсіпкерлер күні болып бекітілді, деп жазады Ozgeris.info.

Бұл күннің таңдалуы да кездейсоқ емес. Он жыл бұрын дәл осы күні Қазақстан Республикасының Кәсіпкерлік кодексі қабылданған еді.

Бүгінде елде 2,3 миллионнан астам кәсіпкер тіркелген. Мемлекет бизнеске қолдау көрсетуге айрықша назар аударып келеді. Жыл басынан бері 288 млрд теңгеге 2 мыңнан астам жоба субсидияланды, 61 млрд теңгеге 737 жобаға кепілдік берілді, сондай-ақ тоғыз мыңға жуық кәсіпкер оқыту бағдарламаларынан өтті. Бұдан бөлек, шағын және орта бизнесті қолдау үшін жаңа «Өрлеу» бағдарламасы іске қосылып, оның аясында 12,6% мөлшерлемемен 270 млрд теңге бөлінді. Ал «Даму» қоры арқылы шағын және орта кәсіпкерлікті қаржыландыруға 271,1 млрд теңге бағытталды. Президент Қасым-Жомарт Тоқаевтың тапсырмасына сәйкес, 2029 жылға дейін орта бизнес үлесін 15%-ға жеткізу көзделіп отыр.

Айта кетейік, 2025 жылы Қазақстанда бірден бес жаңа кәсіби мереке енгізілді. Кәсіпкерлер күнінен бөлек, 7 шілде Қазақстан қолөнершілер күні, 9 шілде Табиғи монополиялар саласы қызметкерлері күні, 15 қыркүйек Санитарлық-эпидемиологиялық қызмет қызметкері күні және 20 қазан Қоғамдық тамақтану саласы қызметкері күні болып бекітілді.