Берлин төріндегі Ратуша ғимаратына ту тіккен қазақ батырының ерлігі тарихта алтын әріппен жазылды. Бұл тарихи оқиға 1945 жылдың 29 сәуірінде болды.
Ол кезде Кенжебай Мәденов небәрі он тоғыз жаста еді. Жас жауынгер 1944 жылы 266-атқыштар дивизиясының 1008-полкінде қызмет етті. Нақтырақ айтсақ 2-батальонның 5-ротасына қарасты взводты басқарған.
Берлин операциясы кезінде оның тобына аса маңызды тапсырма беріледі. Олар Рейхстагтан кейінгі ең басты әкімшілік орталық саналатын Ратуша төбесіне Қызыл Туды орнатуы тиіс еді. Кенжебай Мәденов бастаған сарбаздар бұл бұйрықты мүлтіксіз орындайды. Олардың көзсіз батырлығы Кеңес әскерінің рухын көтеріп шабуылдың қарқынды жалғасуына үлкен ықпал етеді.
Жаужүрек жерлесіміздің бұл ерлігі көптеген тарихи кітаптарға арқау болды. Кеңес Одағының маршалы Георгий Жуков өзінің "Естеліктер мен толғаныстар" еңбегінде осы оқиғаны ерекше суреттеген. 5-екпінді армияның Әскери кеңесінің мүшесі генерал-лейтенант Федор Боковтың "Жеңіс көктемі" кітабында да батырдың есімі аталады. 1948 жылы КСРО Қарулы Күштері министрлігі шығарған "Берлинді алу" басылымында да бұл шайқас толық сипатталған.
Батырдың даңқы шетелге де жетті. Германиялық тілшілер Клаус Похе мен Ганс Олива "Соғыс аяқталған түн" атты еңбектерінде қазақ сарбазының қаһармандығына таңданыс білдірген.
Кенжебай Мәденов Ратуша үшін болған қанды шайқас туралы өзі де қалам тербеді. Оның мақаласы 1970 жылдың 6 маусымында "Қазақстан коммунисі" журналында жарық көрген. Батырдың есімі мектеп оқушыларына арналған "Қазақстан тарихы" оқулықтарына да енді. Бұл кітаптар 1985, 1993 және 2004 жылдары басылып шыққан.
Соғыстан кейін қаһарман бейбіт өмірдегі қызметке білек сыбана кіріседі. Ол 1950 және 1974 жылдар аралығында Батыс Қазақстан мен Гурьев облыстарындағы мемлекеттік қауіпсіздік органдарында жемісті еңбек еткен. Ол Ұлттық қауіпсіздік комитетінің ардагері санатына жатады.
Тарихи тұлға 1925 жылдың 19 ақпанында Батыс Қазақстан облысындағы Қаратөбе ауданында дүниеге келген. Ол Қаракөл ауылдық округіне қарасты Ақтай-сай ауылында туған. Ол 1974 жылы 26 желтоқсанда өмірден озды.
Батыр есімі ел жадында мәңгі сақталады. 2001 жылдың желтоқсанында Атырау облысы бойынша Ұлттық қауіпсіздік комитеті департаментінің ғимаратына арнайы мемориалдық тақта орнатылды. Ал 2005 жылы Атырау қаласындағы үлкен көшелердің біріне Кенжебай Мәденовтің аты берілді.
