Алматы – Өскемен бағытындағы тасжолдың бойында қайғылы жағдай орын алды. Жетісу облысында екі жеңіл көлік бетпе-бет соқтығысып, соның салдарынан бес адам оқиға орнында көз жұмды. Тағы екі азамат түрлі деңгейдегі жарақаттармен ауруханаға жеткізілді, деп хабарлайды ozgeris.info сайты.
Ауыр апат маусымның жиырма алтысы күні кешкі уақытта «Алматы – Өскемен» автожолының 432-шақырымында болған. Соққының қатты болғаны сондай, қос көліктің тізгінінде отырған жүргізушілер мен салон ішіндегі үш жолаушы алған жарақаттарынан сол сәтте жан тапсырды. Дене жарақатын алған қалған екі жолаушыға қазір дәрігерлер медициналық мекемеде тиісті көмек көрсетіп жатыр. Қорқынышты жағдайдың егжей-тегжейін Жетісу облыстық полиция департаментінің баспасөз қызметі растады.
Тәртіп сақшылары аталған дерек бойынша бірден қылмыстық іс қозғады. Қазіргі уақытта қайғылы жол апатының неден болғанын және оқиғаның анық-қанығын анықтау мақсатында сотқа дейінгі тергеу амалдары қызу жүргізіліп жатыр.
