Астанадағы Жоламан әуежайы маңында авиаапат болды, қаза тапқандар бар, деп хабарлайды ozgeris.info сайты ҚР Көлік министрлігіне сілтеме жасап.
"2025 жылғы 22 маусым күні шамамен сағат 11:30-да Астана қаласындағы Жоламан әуежайы маңында оқу-жаттығу ұшуы кезінде TL-2000 жеңіл моторлы әуе кемесімен авиациялық оқиға орын алды. Әуе кемесі жекеменшік тұлғаға тиесілі. Алдын ала мәлімет бойынша, бортта екі экипаж мүшесі болған, екеуі де қаза тапты", – делінген хабарламада.
Хабарламада атап өтілгендей, аталған оқиғаны тексеру үшін арнайы комиссия құрылатын болады.
"Қазақстан Республикасы Көлік министрлігінің көліктегі оқиғалар мен оқыс оқиғаларды тергеу департаментінің қызметкерлері апат орнына аттанды", – делінген ресми мәліметте.
Жоламан әуежайы Ақмола облысы, Шортанды ауданында, Астана қаласының орталығынан шамамен 13 шақырым жерде орналасқан.
