Қазақстан Ұлттық банкі базалық мөлшерлемені 15,75%-ға дейін төмендетті. Реттеушінің мәліметінше, жылдық инфляция 2026 жылғы қыркүйекте 9,3%-ды құрап, қатарынан он екінші ай баяулаған, деп жазады Ozgeris.info.
Инфляцияның төмендеуіне қатаң ақша-кредит саясаты мен теңге бағамының қолайлы динамикасы ықпал еткен.
Атап айтқанда, азық-түлік инфляциясы 9,5%-дан 8,5%-ға дейін төмендеді. Жанар-жағармай бағасының өсу қарқыны баяулауына байланысты азық-түлікке жатпайтын тауарлар инфляциясы да 11,4%-дан 11%-ға дейін азайды. Ал қызмет көрсету саласындағы инфляция 8,9% деңгейінде сақталды. Сонымен қатар реттелмейтін қызметтер бағасының өсу қарқыны әлі де жоғары болып отыр.
Ұлттық банк базалық мөлшерлеме бойынша шешім қабылдау кезінде экономиканың тұрақты өсімін және инфляциялық тәуекелдерді ескерген.
Реттеушінің мәліметінше, базалық мөлшерлемені одан әрі төмендету мүмкіндігі баға қысымының тұрақты түрде бәсеңдегенін растайтын деректерге байланысты болады.
