Ұлытау облысын дамыту бағдарламасы аясында Сәтбаев қаласында ауқымды әлеуметтік жобалар қолға алынды. "Қазақмыс корпорациясы" серіктестігінің басқарма төрағасы Руслан Өскенәлі мен шаһар басшысы Мұрат Бөрібаев құрылыс нысандарын арнайы аралап қайтты. Басты мақсат жұмыстың сапасын бағалап жобалардың уақытылы берілуін қадағалау. Бұл орындар кәсіпорын жұмысшылары мен қарапайым тұрғындар үшін аса маңызды, деп хабарлайды ozgeis.info сайты.
Ең әуелі қалалық аурухананы қайта жаңғырту ісі назарға алынды. Мұнда заманауи травматологиялық пункт бой көтереді. Бұл бастама тұрғындарға жедел медициналық көмек көрсету сапасын арттырып денсаулық сақтау жүйесін айтарлықтай нығайтады. Қазіргі таңда ұйымдастыру рәсімдері толық аяқталып құрылыс бекітілген кестеге сай жүріп жатыр. Жаңа медициналық орталық 2026 жылдың соңында ел игілігіне берілмек.
Келесі маңызды жоба тарихы тау-кен саласымен тығыз тамырласқан шаһардағы "Кенші даңқы" алаңын жаңарту ісіне арналған. Бұл аумақ кеншілер еңбегіне құрмет көрсетіп қана қоймай қаланың басты мәдени орталығына айналады. Жоба аясында барлық жастағы азаматтарға арналған функционалды аймақтар құрылады. Атап айтқанда балалар ойын алаңы, спортпен шұғылданатын воркаут аймағы және жаяу жүргіншілер жолы салынады. Сондай-ақ әдемі субұрқақ пен шағын сәулет нысандары бой көтеріп айнала толықтай көгалдандырылмақ. Бұл өзгерістер қоғамдық белсенділікті арттырып халықтың өмір сүру сапасын жақсартуға септігін тигізеді. Алаңдағы құрылыс пен монтаждау жұмыстары 2026 жылдың үшінші тоқсанында толық аяқталады.
Жұмыс сапарының соңында Руслан Өскенәлі мен Мұрат Бөрібаев қос жобаның жүзеге асуы әкімдік пен корпорацияның жіті бақылауында болатынын кесіп айтты.
