2026 жылы елімізде бірқатар медицина қызметкерлерінің жалақысын көтеру жоспарланып отыр. Бұл туралы Zakon басылымына Денсаулық сақтау министрлігінің баспасөз қызметі мәлімдеді. Әңгіме ең алдымен күнделікті ауыр жағдайда жұмыс істейтін, жауапкершілігі жоғары сала мамандары туралы болып отыр, деп жазады Ozgeris.info.
Министрліктің хабарлауынша, келесі жылдан бастап жұқпалы аурулар қызметінде еңбек ететін мамандар мен жедел медициналық жәрдем фельдшерлерінің жалақысы қосымша өседі.
«2026 жылдан бастап жұқпалы аурулар қызметі мен жедел медициналық жәрдем қызметкерлерінің фельдшерлерінің жалақысы қосымша көтеріледі. Сондай ақ дәрігерлерге қатысты зорлық зомбылықты қолданғаны үшін жауапкершілік күшейтіледі», деп атап өтті ведомство.
Бұл шешім тек қаржылық қолдаумен шектелмейді. Денсаулық сақтау министрлігінің мәліметінше, медицина қызметкерлерінің қауіпсіздігін қамтамасыз ету мәселесіне де ерекше көңіл бөлініп отыр. Осы мақсатта Ішкі істер министрлігімен бірлесіп арнайы іс қимыл жоспары әзірленген.
Жоспар аясында еліміздегі медициналық ұйымдарда 152 полиция бекеті орнатылған. Бұл шара дәрігерлер мен фельдшерлердің қызмет барысында өзін қауіпсіз сезінуіне бағытталған. Сонымен қатар медициналық мекемелердегі тәртіп пен бақылауды күшейту көзделіп отыр.
Министрлік мәліметінше, жедел жәрдем қызметінде жұмыс істейтін 2,1 мыңнан астам фельдшерді бейнежетондармен жарақтандыру мәселесі де шешіліп жатыр.
«Сондай ақ медициналық ұйымдарда жасанды интеллект аналитикасы бар бейнебақылау жүйелерін енгізу және 626 қабылдау бөлімшесінде дабыл түймелерін орнату қарастырылуда», деп түсіндірді ведомство өкілдері.
Бұл бастамалар медицина қызметкерлерінің еңбегін қорғауға, олардың қауіпсіздігін арттыруға және қоғамдағы дәрігер мамандығына деген құрметті күшейтуге бағытталған. Келер жылы жүзеге асатын бұл өзгерістер сала мамандары үшін маңызды қолдау болмақ.
