OpenAI компаниясы ChatGPT платформасында жеке қаржыға арналған жаңа функцияны тестілеуді бастады. Енді АҚШ-тағы ChatGPT Pro қолданушылары банк шоттарын, несие карталарын, брокерлік есепшоттарын және өзге де қаржылық сервистерін жүйеге байланыстырып, барлық қаржылық ақпаратты бір платформа арқылы бақылай алады, деп жазады Ozgeris.info.
Жаңа мүмкіндік әзірге АҚШ-тағы қолданушылардың бір бөлігіне ғана қолжетімді. Қызмет веб-нұсқа мен iOS операциялық жүйесінде сынақтан өткізіліп жатыр. Пайдаланушылар жүйе арқылы шығындарын, жазылымдарын, қарыздарын, жинақтарын және инвестицияларын бір панельден көре алады. Сонымен қатар ChatGPT-ге нақты қаржылық деректер негізінде сұрақ қойып, талдау жасау мүмкіндігі ұсынылады.
Мысалы, қолданушы ай сайынғы шығын құрылымын, қай сервистерге көп қаржы жұмсалып жатқанын немесе жинақ көлемінің өзгерісін сұрай алады. Жүйе осы мәліметтерді өңдеп, қаржылық ахуал бойынша түсіндірме береді. BILD басылымының мәліметінше, OpenAI қауіпсіздік мәселесіне ерекше назар аударып отыр. Компания ChatGPT арқылы ақша аудару, шот төлеу, банк параметрлерін өзгерту немесе қандай да бір қаржылық мәміле жасауға мүмкіндік берілмейтінін атап өткен.
Сонымен қатар OpenAI пайдаланушылардың банк шоттарының толық нөмірін көрмейтінін мәлімдеді. Компания қаржы деректеріне қол жеткізу кезінде қосымша қорғаныс тетіктері қолданылатынын да хабарлаған.
Компания сарапшыларының пікірінше, бұл қадам жасанды интеллект платформаларының мүмкіндігін жаңа деңгейге шығаруы мүмкін. Бұған дейін ChatGPT негізінен мәтін жазу, ақпарат іздеу және талдау жасау құралы ретінде қолданылып келсе, енді қаржылық көмекші қызметіне де бейімделе бастады. Мұндай жүйелер алдағы уақытта адамдардың жеке бюджетін жоспарлауға, шығынды бақылауға және қаржылық сауаттылықты арттыруға ықпал етуі ықтимал.
Дегенмен мамандар цифрлық қаржы сервистерін пайдалану кезінде сақтық маңызды екенін ескертеді. Өйткені қаржылық деректер – ең сезімтал ақпараттың бірі. Сондықтан пайдаланушылар қосымша қауіпсіздік параметрлерін мұқият тексеріп, тек сенімді платформаларды қолдануы қажет.
