Астанада жеңіл рельсті көлік – LRT жүйесі ресми түрде іске қосылды. Қаладағы жаңа көлік инфрақұрылымымен қатар жолақы төлеу жүйесі де цифрлық форматқа көшірілді. Енді елорда тұрғындары мен қонақтары LRT билетін Kaspi.kz мобильді қосымшасы арқылы онлайн сатып ала алады, деп жазады Ozgeris.info.
Жаңа жүйе барынша жеңілдетілген. Билет сатып алу үшін қолданушы Kaspi.kz қосымшасындағы іздеу жолағына «LRT» деп жазып, төлем жасайды. Төлем расталғаннан кейін жүйе автоматты түрде арнайы QR-код қалыптастырады. Электронды билет қолданушыға хабарлама ретінде жіберіліп, сонымен қатар «Төлемдер тарихы» бөлімінде сақталады.
Стансадағы бақылау жүйесінен өту үшін жолаушы турникетке QR-кодты сканерлесе жеткілікті. Цифрлық билет форматы қағаз билет пен пластикалық карталарға тәуелділікті азайтып, жолаушылар ағынын жылдам өткізуге мүмкіндік береді. Бұл әсіресе қарбалас уақытта уақыт үнемдеуге көмектеседі.
