Қазақстанда 25 қыркүйектен бастап 2011 жылғы үлгідегі 5000 теңгелік банкноттар төлем құралы ретінде жарамсыз болады. 24 қыркүйекке дейін олар жаңа үлгідегі ақшамен қатар қолданыста қалып, дүкендер мен қызмет көрсету орындарында қабылдануы тиіс еді, деп жазады Ozgeris.info.
Ұлттық банк хабарлағандай, ескі купюраларды айырбастау тәртібі қарастырылған. Азаматтар үш жыл ішінде екінші деңгейлі банктер мен Қазпошта бөлімшелерінде оларды жаңа банкноттарға ауыстыра алады. Ал Ұлттық банктің өңірлік филиалдарында айырбастау мерзімсіз жүргізіледі.
Жаңа үлгідегі 5000 теңгелік банкноттар 2023 жылдың соңында айналымға енгізілген болатын. Қаржы реттеушісі келесі жылы тағы бірнеше ескі банкноттарды кезең-кезеңімен айналымнан шығару жоспарланғанын да хабарлады.
Мамандар тұрғындарға қолдағы ақшасын тексеріп, ескі үлгідегі 5000 теңгеліктерді уақтылы өткізуге кеңес береді. Бұл қаражаттың жарамсыз болып қалмауы үшін маңызды.
