Алматы қаласы Орталық Азиядағы ең ірі авиациялық хабқа айналу жолында қарқынды дамып келеді. Алдағы уақытта әуежайдың өткізу қабілеті жылына 40 миллион жолаушыға дейін артып, мегаполис Еуропа мен Азияны байланыстыратын негізгі авиациялық торап ретіндегі позициясын нығайтпақдеп хабарлайды ozgeris.info сайты.
Қазіргі таңда Алматы халықаралық әуежайында ауқымды модернизация жұмыстары жүріп жатыр. Маңызды жаңалықтардың бірі – ішкі терминалдың толық жаңаруы. Жоспар бойынша, келушілерге арналған жаңартылған ішкі терминал 2026 жылдың шілдесіне қарай пайдалануға беріледі.
Даму жоспары аясындағы негізгі жобалар:
Инфрақұрылым: Жаңа қонақүй құрылысы, тұрақ аймақтарын кеңейту және халықаралық терминалды заманауи талаптарға сай жаңғырту.
Техникалық база: Ұшу-қону жолағын реконструкциялау және ұшақтарға қызмет көрсету инфрақұрылымын жақсарту.
Логистика: Жаңа жүк терминалын салу арқылы транзиттік әлеуетті арттыру.
Әуежайды дамытудың 2050 жылға дейінгі ұзақ мерзімді стратегиясы аясында барлығы 130-дан астам жобаны іске асыру көзделген. Бұл шаралардың барлығы Алматыны халықаралық деңгейдегі бәсекеге қабілетті және жайлы авиациялық орталыққа айналдыруға бағытталған.
Мамандардың пікірінше, әуежайдың кеңеюі тек туризмнің дамуына ғана емес, сонымен қатар ел экономикасына инвестиция тартуға және жаңа жұмыс орындарын ашуға септігін тигізеді.
