Қазақстандық танымал заңгер Мейірман Шекеев әлеуметтік желіде халық жазушысы, марқұм Мұхтар Шаханов пен Желтоқсан оқиғасына қатысты жағымсыз пікір білдірген блогерді жауапқа тартуды талап етуде. Заңгердің пайымдауынша, блогердің әрекеті жеке тұлғаның ғана емес, тұтас ұлттың намысына тиіп отыр, деп хабарлайды ozgeris.info сайты.
Даудың басы әлеуметтік желідегі «Мамбетадор» атты пайдаланушының жазбасынан басталды. Ол Алматыдағы Розыбакиев көшесінің атауын Мұхтар Шахановтың құрметіне өзгерту туралы ұсынысқа шұғыл қарсылық білдіріп, бейәдеп сөздер қолданған. Блогер Шахановты «ревизионист» деп айыптап, 1986 жылғы Желтоқсан оқиғасына қатысушыларды «бандиттер» мен «бүлікшілер» деп атаған.
«Желтоқсан бүлікшілерін ақтаған «біреудің» атына ауыстыру орынсыз. Тіпті оның атын атаудың өзі жағымсыз», — деп жазған пайдаланушы өз парақшасында.
Заңгер Мейірман Шекеев бұл пікірлердің астарында ұлтаралық араздықты қоздыру немесе тарихи шындықты бұрмалау белгілері болуы мүмкін екенін алға тартады. Ол құқық қорғау органдарынан аталған факті бойынша тексеріс жүргізіп, блогердің әрекетіне құқықтық баға беруді сұрамақ.
Қазіргі таңда бұл мәселе әлеуметтік желіде қызу талқыланып жатыр. Қолданушылардың басым бөлігі ұлттық мүдде мен тарихи тұлғаларды қорғау қажеттігін айтып, заңгердің бастамасын қолдауда.
