Мемлекет басшысы Қасым-Жомарт Тоқаев Қазақстан Халық Кеңесінің бірінші сессиясын жоғары деңгейде өткізуді тапсырды. Бұл жаңа құрылым Әділетті Қазақстанның іргетасын бекітетін айрықша диалог алаңы саналады, деп хабарлайды ozgeris.info сайты.
Президент Ақордада осы ұйым төрағасының орынбасары әрі Хатшылық басшысы Қанатбек Жайсанбаевты қабылдады. Кездесу барысында жаңа кеңес пен оның хатшылығын құру бағытындағы жұмыстар егжей-тегжейлі баяндалды.
Хатшылық ұйымның жұмысын жан-жақты реттеп отырады. Бұл құрылым Кеңесті құқықтық, қаржылық және материалдық-техникалық жағынан толық қамтамасыз етеді. Сонымен бірге ақпараттық-талдау және ұйымдастыру шаралары да осы бөлімнің жауапкершілігінде.
Қасым-Жомарт Тоқаев ведомство басшысына нақты міндеттер жүктеді. Ең бастысы Кеңестің мемлекеттік органдармен және азаматтық қоғам институттарымен байланысын үйлестіру қажет. Бұл қатарда түрлі мекемелер мен халықаралық ұйымдармен тиімді ықпалдастық орнату ісі де бар.
