Бүгіннен бастап жаңа Құрылыс кодексінің нормалары заңды күшіне енді. Биыл елімізде 20 миллион шаршы метр тұрғын үй ел игілігіне беріледі. Саладағы жұмыс қарқыны айтарлықтай артқан. Алғашқы бес айдың өзінде құрылыс көлемі 13,4 пайызға өсті. Бұл сандық көрсеткіш 2,4 триллион теңгені құрайды, деп хабарлайды ozgeris.info сайты.
Алдағы жылдары коммуналдық инфрақұрылым толық жаңарады. Осы мақсатта "Энергетикалық және коммуналдық секторларды жаңғырту" ұлттық жобасы қолға алынды. 2030 жылға дейін 5 мың шақырым ауыз су құбыры алмастырылады. Оған қоса 2,8 мың шақырым су бұру желісі жаңартылмақ. Бұл маңызды іске 1 триллион теңгеден астам қаражат жұмсалады. Сонымен қатар 800 миллиард теңгеге 45 кәріз тазарту бекеті салынып қайта қалпына келтіріледі.
Өнеркәсіп саласы да қалыс қалған жоқ. Өңдеу өнеркәсібі 9 пайыздық өсім көрсетті. Мұндай нәтижеге жаңа өндіріс орындарын ашу арқылы қол жеткізілді. Жыл соңына дейін құны 1,7 триллион теңгелік 200 инвестициялық жоба іске қосылады. Қазірдің өзінде 252 миллиард теңгелік 74 кәсіпорын жұмысын бастап кетті.
Машина жасау бағытында отандық өндірушілерге үлкен қолдау көрсетіліп жатыр. Қазіргі таңда арнайы өнеркәсіптік кластерлер жүйесін құру үшін құқықтық негіздер жетілдірілуде. Инвесторларға қолайлы жағдай жасау басты назарға алынған. Олар үшін арнайы экономикалық аймақтардың мүлдем жаңа үлгісі әзірленді. Енді кәсіпкерлер "бір терезе" қағидаты арқылы қызмет алады.
Бұл ауқымды өзгерістердің барлығы Мемлекет басшысының экономиканың нақты секторын дамыту тапсырмасы аясында жүріп жатыр. Үкіметтің кезекті отырысында Өнеркәсіп және құрылыс министрі Ерсайын Нағаспаев осы атқарылған істердің есебін берді. Билік өндірісті өркендетіп тұрмыстық жүйелерді жаңғыртуды жүйелі түрде жалғастыра береді.
