Атырауда 14 жастағы қыз жоғалып кетті

Жасөспірім қыз 1 желтоқсан күні інісімен бірге үйден шыққанымен, мектепке бармағаны белгілі болды, деп жазады ozgeris.info. 

Таратылған мәліметтерге сүйенсек, бейнебақылау камералары олардың үйден бірге шыққан сәтін тіркеп алған.

«Алдын ала болжам бойынша, жолда екі бөлек кеткен: ұл бала мектебіне барған, ал қыз өзен жаққа қарай бет алған. Одан кейін оның жүрген жері анықталмай жатыр», — деп хабарлайды бұқаралық ақпарат құралдары.

Атырау облыстық Полиция департаментінің хабарлауынша, 2011 жылы туған жасөспірім 1 желтоқсанда күндіз сабаққа шыққан, бірақ үйіне қайтпаған. Жоғалған кезде қыздың үстінде қара күрте, көк шалбар, ақ кроссовка болып, қоңыр сөмке ұстағаны айтылды. Қазір оны іздеу жұмыстары кең көлемде жүргізілуде.

Қыз туралы қандай да бір дерек білсеңіз, полиция 102 нөміріне хабарласуды сұрайды.