Елордада бесінші рет ұйымдастырылған Astana Half Marathon жүгіру сайысы өтті. Бұл жолғы ірі қалалық жарыс жеті мың адамның басын қосып, шетелдік спортшылар саны бойынша жаңа тарихи рекорд орнатты. Бұл туралы қала әкімдігі хабарлады, деп жазады ozgeris.info сайты.
Биылғы додаға әлемнің отыз мемлекетінен екі жүз қырық үш шетелдік спортшы арнайы келген. Шетелдік қонақтардың басым бөлігі Ресейден (91 адам), Өзбекстаннан (28 адам) және АҚШ-тан (17 адам) келді. Сондай-ақ Қытайдан он бес, Қырғызстаннан он төрт, Франциядан он бір адам қатысқан. Бұдан бөлек Оңтүстік Корея, Ұлыбритания, Польша және Германия мемлекеттерінің өкілдері де жарыс жолына шықты. Жалпы алғанда марафон географиясы Азия, Еуропа, Америка, Африка және Таяу Шығыс елдерін қамтыды.
"Смелость быть первым" корпоративтік қорының өкілі Ғалымжан Есенов бұл шараның маңызына тоқталды. Оның айтуынша бұл сайыс Астананың халықаралық беделін арттырып отыр. Жарыс трассалары World Athletics стандарттарына сай сертификатталған. Сондықтан көптеген тәжірибелі жүйріктер жаңа рекорд орнату үшін елорданы таңдайды.
Биыл марафон аясында экологиялық бастамаларға да үлкен мән берілді. "Таза Қазақстан" акциясы аясында жарыс аумағында қалдықтарды бөлек жинайтын арнайы орындар жұмыс істеді. Жиналған қайта өңдеуге жарамды заттар EcoNetwork серіктестігі арқылы зауытқа жіберіледі.
Марафонның тағы бір ерекшелігі – инклюзивті ортаны қолдау. Жарысқа Funduk Team командасының он экипажы қатысты. Олардың құрамында қырыққа жуық адам болды. Әр топ бір ерекше қажеттілігі бар спортшы мен оған көмектесетін үш пилоттан құралған.
Жарыс бағдарламасында қатысушылар 21,1 шақырым, 10 шақырым қашықтықтарда бақ сынады. Сонымен қатар скандинавиялық жүріс және "Экиден" эстафетасы ұйымдастырылды.
