Алматыда ақылы интимдік трансляция тарататын жасырын пәтердің ісі әшкере болды. Желіде оқиға орнынан түсірілген бейнежазба таралды, деп хабарлайды ozgeris.info сайты.
Арнайы операцияны киберқылмысқа қарсы күрес басқармасының мамандары Медеу ауданының полицейлерімен тізе қосып жүзеге асырды. Тәртіп сақшылары вебкам-студия ретінде жабдықталған үйге кіріп барғанда іште тікелей эфир жүріп жатқан. Бөлмеден желіде отырған бойжеткен мен студия әкімшісі құрықталды. Олар кідіртпестен полиция бөлімшесіне жеткізілді.
Тінту барысында құқық қорғаушылар тергеуге қажетті бірқатар айғақзатты тәркіледі. Заттай дәлелдемелер қатарында дербес компьютерлер, бейнекамералар және стрим жасауға арналған арнайы құрылғылар бар. Бұл техникалық жабдықтар алдағы зерттеу жұмыстарына негіз болмақ.
Қазіргі уақытта аталған дерек негізінде қылмыстық іс қозғалды. Тергеушілер заңсыз бейнекөрсетілім ұйымдастырған басты тұлғаларды іздестіруге кірісті. Сонымен қатар бұл тірлікке қатысы болуы ықтимал өзге де адамдарды анықтау жұмыстары жалғасып жатыр.
