«Қазақстан темір жолы» ұлттық компаниясы басқарма төрағасы мен «Самұрық-Қазына» қоры басқарма төрағасының ұсталуына қатысты ресми мәлімдеме жасады, деп хабарлайды Ozgeris.info.
Компанияның хабарлауынша, 2026 жылғы 12 қарашада жария болған аталған ақпарат сотқа дейінгі тергеп-тексеру аясында назарға алынған.
«ҚТЖ» құқық қорғау органдарына жан-жақты жәрдем көрсетіп, қолданыстағы заңнамаға сәйкес сұратылған ақпарат пен материалдарды ұсынуға дайын екенін мәлімдеді.
Компания әзірге жарияланған ақпараттан өзге мәліметке ие емес екенін атап өтті. Сонымен қатар Қылмыстық-процестік кодекстің 201-бабына сәйкес, сотқа дейінгі тергеп-тексеру деректері жария етілмейтіндіктен, қосымша түсініктеме беруден бас тартты.
Сондай-ақ «ҚТЖ» мен оның компаниялар тобының жұмысы штаттық режимде жалғасып жатқаны айтылды. Компания инвесторлар, кредиторлар, халықаралық қаржы институттары және іскерлік серіктестер алдындағы барлық міндеттемелердің күшінде екенін әрі қолданыстағы келісімдерге сәйкес орындалатынын растады.
