Қостанайда емделушілердің бірі хирург дәрігерді соққыға жықты. Ер адам жансақтау бөліміне түсті, деп хабарлайды Sputnik Қазақстан тілшісі.
Оқиға Қостанай облыстық ауруханасында болған.
Хирург ота жасап шығып, қабылдау бөлімінде науқастарды қарауға барған. Сонда кезекте тұрған бір пациент кенеттен ашуға бой алдырып, дәрігерді бір ұрған. Хирург есінен танып қалған. Кейін ол жансақтау бөліміне жатқызылды.
Полиция денсаулыққа қасақана ауыр зиян келтіру бойынша сотқа дейінгі тергеуді бастады.
"Қазіргі уақытта осы қылмысты жасады деген күдікпен облыстың 34 жастағы тұрғыны ұсталды. Қажетті тергеп-тексеру шаралары жүргізілуде. Оның нәтижесі бойынша қолданыстағы заңнамаға сәйкес процессуалдық шешім қабылданады", - дейді полицейлер.
Ал Қарағанды облысында маммологиялық орталықтың медбикесі зардап шекті. Әйелімен бірге келген 42 жастағы ер адам белгісіз себеппен қызметтік бөлменің есігін бұзып кіріп, медицина қызметкерін соққыға жыққан. Күдікті жүйке-психиатриялық орталыққа жеткізіліп, дәрігерлердің бақылауына алынды.
Қылмыстық іс қозғалып, облыстық полиция департаментінің басшылығы тергеуді жеке бақылауына алды.
