Жалған ақпарат таратты деген айыппен үйқамаққа алынған журналист Ботагөз Омарованың ісі қоғамда үлкен резонанс тудырды. Осы уақытқа дейін тек журналист пен оның жақтастарының ұстанымы айтылып келсе, енді жанжалдың екінші тарапы – «ВД Инжиниринг» компаниясының құрылтайшысы Азамат Үсімбеков Ulysmedia.kz порталына берген сұхбатында жағдайды өз аузымен түсіндірді деп жазды ozgeris.info сайты.
Үсімбековтің айтуынша, журналистке қарсы шағым түсіруге Астанадағы атқора құрылысына қатысты жарық көрген бейнематериалдар түрткі болған. Омарованың зерттеуінде компания жұмысшыларға 600 миллион теңге қарыз екені айтылады. Алайда компания басшысы бұл ақпаратты жоққа шығарды.
Оның сөзінше, мәселе қосалқы мердігер «Capital Engineering» пен олардың серіктесі «Ремстрой» компаниясы арасындағы үш жылға созылған даудан туындаған. Үсімбеков жеке тұлға ретінде де, заңды тұлға ретінде де оларға ешқандай қарыз еместігін, барлық жұмыс актілері жабылып, ақша толық төленгенін алға тартты.
Кәсіпкер журналистпен тікелей байланысқа шығып, жұмысшылармен бірге ортақ кездесу ұйымдастырған:
-
Жиында барлық құжаттар мен банк аударымдары көрсетілген.
-
Жұмысшылардың өзі Үсімбековтің қарыз еместігін растаған.
-
Кәсіпкердің айтуынша, Ботагөз Омарова қателігін түсініп, бейнероликті өшіруге уәде берген. Алайда материалдар одан әрі жариялана берген.
Үсімбеков мәселені сотқа дейін шешуге тырысқанын, тіпті жұмысшыларға өз қалтасынан жалақы төлеп беруді де ұсынғанын жеткізді. Ол Омарованың бұл іске саналы түрде барғанын айтады. «Оны түрмеге отырғызу ниетім жоқ. Менің басты позициям – ол мұны саналы түрде жасағанын, шындықты біле тұра жұртты шатастырғанын мойындауы керек», – дейді компания басшысы.
