Үкімет басшысының бірінші орынбасары Нұрлыбек Нәлібаев Ұлытау облысына арнайы іссапармен барды. Жоғары лауазымды шенеунік аймақ басшысы Дастан Рыспековпен бірге «Қазақмыс» Тобының қарамағындағы өндіріс орындары мен әлеуметтік нысандардың тыныс-тіршілігін көзбен көрді. Ал алпауыт компания атқарып жатқан ауқымды инвестициялық қадамдар жайлы кәсіпорынның басқарма төрағасы Руслан Өскенәлі егжей-тегжейлі баяндап берді, деп хабарлайды ozgeris.info сайты.
Жезқазған мыс балқыту зауытында экологиялық тазалық пен өндірістік қуатты арттыру бағытындағы жоспарлар ортаға салынды. Қазіргі уақытта мұнда құрал-жабдықтарды жаңарту және күрделі жөндеу шаралары пысықталып жатыр. Стратегиялық маңызы жоғары бастамалардың ішінде жаңадан бой көтеретін күкірт қышқылы цехы мен газ-поршеньді электр станциясының құрылысы ерекше атап өтілді. Бұл нысандар зауыттың дербес энергия көзін қалыптастырып, табиғатқа келетін залалды барынша азайтуға мүмкіндік береді. Сонымен қатар Жезқазған байыту фабрикасындағы кездесу де өнімді болды. Мәртебелі мейман шикізатты өңдеу ісінің сапасын жақсартуға арналған жаңғырту бағдарламасымен жіті танысты.
Билік өкілдері мен бизнес жетекшілері өңірдегі тұрмыс сапасын жақсарту мәселесін де назардан тыс қалдырмады. Соның бірі – Кеңгір су қоймасының жағалауын көріктендірудің екінші кезеңі. Бұл игі іс облыс әкімдігі мен «Қазақмыс» компаниясының бірлескен жобасы аясында атқарылуда. Сәулетті демалыс орнының құрылысына шамамен 3.4 миллиард теңге бағытталған. Құрылысшылар бұл жұмысты 2026 жылдың төртінші тоқсанында толық аяқтауды көздеп отыр.
Кәсіпорын басшысы Руслан Өскенәлі зауыттарды заман талабына сай жарақтандыру мен аймақтың инфрақұрылымын дамыту ісі бір-бірімен тығыз байланысты екенін алға тартты. Сапалы экология мен жайлы орта – ұзақ мерзімді стратегияның алтын арқауы.
Бүгінде «Қазақмыс» Тобы Ұлытау өңірінің өркендеуіне зор үлес қосып келе жатқан негізгі инвестор саналады. Мәселен 2026 жылдың еншісінде ғана компания жалпы құны 30 миллиард теңгеден асатын әлеуметтік бағдарламаларды жүзеге асыруға кірісті. Нақтырақ айтсақ, Серке Қожамқұлов атындағы облыстық театр ғимараты жаңғыртылып, «Жастар» саябағы заманауи үлгіде абаттандырылады. Оған қоса жаңадан Ұлытау университеті ірге көтеріп, білім қуған жастар үшін зәулім жатақхана бой көтереді. Бұл тізімге спорт, денсаулық сақтау және қалалық шаруашылықты дамытуға арналған өзге де маңызды жобалар енген. Осы игі шаралардың барлығы жергілікті халықтың әл-ауқатын арттыруға қызмет етпек.
