Астана төрінде мемлекеттер арасындағы байланысты жаңа белеске көтеретін маңызды кездесу өтті. Қазақстанның Үкімет басшысы Олжас Бектенов елімізге ресми сапармен келген Грузия Премьер-министрі Ираклий Кобахидземен жүздесті. Саяси келіссөздер барысында сауда-саттық, инвестиция тарту, көлік-логистика және энергетика саласындағы өзара іс-қимыл мәселелері жан-жақты сөз болды. Сондай-ақ заман талабына сай цифрландыру бағыты да назардан тыс қалмады. Әсіресе қос тарап технологиялық әріптестікті нығайту аясында жасанды интеллект жобаларына айрықша мән берді, деп хабарлайды ozgeris.info сайты.
Бұл жүздесудің негізгі мақсаты Мемлекет басшысы Қасым-Жомарт Тоқаев пен грузиялық мәртебелі мейманның арасында кеше ғана қол жеткізілген жоғары деңгейдегі уағдаластықтарды іс жүзінде дамыту болып табылады. Олжас Бектенов бұл ресми сапар қос мемлекеттің арасындағы саяси диалог пен берік әріптестіктің жоғары деңгейін көрсететінін жеткізді. Оның пайымдауынша, Қазақстан бауырлас Грузия елін Оңтүстік Кавказдағы және Қара теңіз аймағындағы айнымас дос әрі сенімді стратегиялық серіктес деп таниды. Осыған орай отандық Үкімет тәжірибелік байланыстарды одан әрі тереңдетуге әркез дайын.
Өз кезегінде Ираклий Кобахидзе де Қазақстанның ерекше орнын атап өтті. Елдерімізді ғасырлар бойы жалғасып келе жатқан тарихи достық қарым-қатынастар біріктіреді. Дәл осы фактор саяси және экономикалық байланыстарды бекемдеудің алтын арқауы саналады. Грузия Үкіметінің басшысы екіжақты стратегиялық әріптестіктің орнағанына дән риза. Ол Қазақстанда жүріп жатқан ауқымды жаңғыру үдерістерін жіті бақылап отырғанын және алдағы уақытта ынтымақтастықтың аясы кеңейе түсетініне нық сенетінін білдірді.
Жиынды қорытындылаған тараптар басым бағыттар бойынша бірлескен жобаларды жүзеге асыруға және стратегиялық әріптестікті нығайтуға толық әзір екендіктерін растады. Достық байланыстардың экономикалық көрсеткіштері де көңіл көншітеді. Мәселен 2025 жылдың қорытындысы бойынша екі ел арасындағы өзара сауда айналымы 184.5 миллион долларды құраған еді. Ал үстіміздегі жылдың қаңтар мен сәуір айларының аралығында бұл көрсеткіш 53 миллион долларға жетті. Бүгінгі таңда отандық нарықта грузин капиталының қатысуымен 600-ден астам компания табысты жұмыс істеп жатыр. Сонымен қатар 14 ірі ұйым "Астана" халықаралық қаржы орталығының алаңында ресми түрде тіркелген.
