Қазақстанда адам сенгісіз жағдай орын алды. Белгісіз бір топ адамдар 1,5 жыл бұрын өмірден өткен кішкентай баланың атын пайдаланып, оның емделуі үшін ақша жинауды жалғастырып келгені белгілі болды деп хабарлайды Оzgeris.info сайты Qazaq.today сайтына сілтемемен. Бұл жайында марқұмның ата-анасы жақында ғана біліп, қатты шошып, амалсыздан құқық қорғау органдарына жүгінді.
Оқиғаның мән-жайын жеті баланың анасы Оңласын Асылбаева баяндады. Оның кенже ұлы Диас Мұса ұзаққа созылған ауыр дерттен дүниеден өткен еді.
«Балам түсіме кірді, мұңлы болып, жылап жатыр екен»
Оңласын ханымның айтуынша, жүрегін ауыр сезім қаптағандай, алаяқтардың әрекеті әшкере болардан бір күн бұрын арманда көрінген.
«Балам түсіме кірді. Өте мұңлы, жылап жатыр екен. Маған ренжігендей болды. Ертеңіне таныстарым әлеуметтік желіде видеоны жіберді. Сол видеода алаяқтар менің ұлымның суретін қойып, қайырымдылық қор ашқан екен. Баламның рухын шырқыратып, мені де уайымға қалдырды. Олар не үшін баламды тағы да азаптайды?» – дейді көз жасын сүртіп, ана.
Шын мәнінде, Диастың ата-анасы ұлын емдеу үшін екі жыл бұрын ғана қаражат жинаған. Сол кезде халықтан 70 мың доллар жиналып, 2024 жылы көмек жинау толықтай тоқтатылған болатын.
Ұлын жоқтаған ата-анасы жалған ақпарат туралы дереу полицияға арызданған. Құқық қорғау органдары желіде алаяқтық әрекет жасаған тұлғаларды анықтағанымен, күдіктілер әлі ұсталған жоқ. Қазіргі таңда тергеу амалдары жүргізілуде, әрі іс әлі де толық зерттелуде.
