Ғылым және жоғары білім министрлігі Ұлттық бірыңғай тестілеудің мазмұны мен өткізу тәсілін түбегейлі жаңартуды қолға алмақ, деп жазады ozgeris.info сайты.
Министр Саясат Нұрбектің сөзінше, бұл жұмысқа әлемдегі жетекші ұйым – Educational Testing Service (ETS) тартылмақ. Аталған компания жыл сайын 180 мемлекетке 50 миллионнан астам тест дайындайды және білім беру жүйесіне арналған заманауи шешімдер ұсынады.
Мемлекет басшысының Нью-Йорктегі сапары барысында ETS басшыларымен келіссөз жүргізілген. Қазақстан тарапы ұйымның тәжірибесін пайдалану арқылы ҰБТ-ны халықаралық деңгейге жақындатуды көздеп отыр.
«80 жылдық тарихы бар ETS тек тест құрастырумен ғана емес, сонымен қатар тестология ғылымын зерттеумен де айналысады. Біз олардың үздік мамандарымен бірлесіп, ҰБТ-ның мазмұны мен әдістемесін қайта қараймыз. Ол үшін арнайы жұмыс тобы құрылады», – деді министр.
Алдағы айда ETS-тің зерттеушілер тобы Қазақстанға келіп, ұлттық емтиханды жаңғырту процесін бастайды.
Саясат Нұрбектің айтуынша, мақсат – ҰБТ-ны сапасы жоғары халықаралық деңгейдегі тестілер қатарына қосу.
