Қазақстанның екі қаласында жануарларға деген тасбауырлықты көрсететін оқиғалар жұрттың жағасын ұстатты. Семей қаласында кішкене балалардың көзінше арыстандарға тас лақтырған ер адамдар анықталды. Олар 29 және 36 жастағы ересек азаматтар болып шықты. Осынша жасқа келсе де, аңға тас атуды ермек көргендердің іс-әрекетінен құзырлы органдар жануарларға деген қатыгездік нышанын байқамаған. Нәтижесінде оларға тек "ұсақ бұзақылық" бабы бойынша әкімшілік айыппұл салынды деп хабарлайды ozgeris.info сайты.
Дәл осы уақытта Шымкенттегі хайуанаттар бағында да келеңсіз жағдай тіркелді. Онда бір әйел өз баласын қояндар отырған тордың ішіне кіргізіп жіберген. Кішкентай бала үрейі ұшқан жануарларды соңынан қуып, оларды ұстап мазалаған. Ал анасы бұл көріністі еш қымсынбастан бейнетаспаға түсіріп, бақылап тұрған.
Бұл екі жағдай да қоғамдағы үлкен мәселенің бетін ашып берді. Көптеген адамдар үшін жануарлар тірі жан иесі емес, жай ғана көңіл көтеретін ойыншық секілді көрінеді. Мамандардың айтуынша, ересектердің мұндай әрекеттері өскелең ұрпақтың санасына теріс әсер етіп, қоғамда қатыгездіктің белең алуына себеп болады.
Жануарларды қорғау мен оларға құрметпен қарау мәдениеті әлі де ақсап тұрғаны өкінішті. Осындай оқиғалардан кейін қоғамда агрессия мен мейірімсіздіктің қайдан шығатынын түсіну қиын емес.
