2025 жылы Қазақстанда 45,7 мың ажырасу тіркелді. Бұл туралы Ұлттық статистика бюросы мәлімдеді деп жазды ozgeris.info сайты.
Ажырасулардың басым бөлігі қалалық жерлерде тіркелген – 34 мың (74,4%), ал ауылдық жерлерде 11,7 мың жағдай (25,6%) анықталған. Жалпы ажырасу коэффициенті 1000 адамға шаққанда 2,24-ті құрады.
Өңірлер бойынша ең жоғары көрсеткіш Павлодар облысында (3,43), Қарағанды облысында (3,41) және Солтүстік Қазақстан облысында (3,28) тіркелді. Ең төмен деңгей Түркістан облысында байқалды – 1,03.
Статистикаға сәйкес, ажырасулардың ең көп үлесі бірге 1–4 жыл тұрған жұптарға тиесілі – 35%. Сонымен қатар, 5–9 жыл некеде болғандар арасында бұл көрсеткіш 24%-ды құрады. Ал 8% жұп некені бір жылға жетпей бұзған.
2025 жылы елде жалпы 115,9 мың неке тіркелген. Орташа неке жасы ерлер арасында 27,9 жасты, әйелдер арасында 25,3 жасты құрады.
